Մասնագիտություններ, որոնք անճանաչելիորեն փոխում են մարդուն

Շփվել հաճախորդների հետ, սուրճ եփել, փոքրիկների համար էքսկուրսիաներ անցկացնել. մեր օրերում կարելի է ընտրել ցանկացած մասնագիտություն և իսկապես երջանիկ լինել: Աշխատանքների հսկա ցուցակում, սակայն, կան պաշտոններ, որոնք շատ ավելի ուժեղ են ազդում անձի ձևավորման և նրա հոգեբանական վիճակի վրա: Adme-ն առանձնացրել է մասնագիտություններ, որոնք կարող են անձին փոխել անճանաչելիության աստիճանի:

Դերասան

Մասնագիտություն, որ ասոցացվում է մեծ հոնորարների ու կարմիր գորգերի հետ, իրականում այնքան էլ գրավիչ չէ. Հետազոտությունը, որ անցկացրել են Լոնդոնի հոգեբանները, ցույց է տվել, որ դերասանների մեծ մասն իր կյանքով չի ապրում. դերասանները հաճախ այնքան են մտնում դերի մեջ, որ անգամ բեմից դուրս շարունակում են խաղալ: Գիտնականները պարզել են՝ մարդիկ, ովքեր կինոյի ոլորտում են աշխատում կամ սովորում են դրամատիկական դպրոցներում, ավելի հաճախ են տառապում անձի երկվությամբ կամ նյարդային խանգարումներ ունենում:

Նկարիչ

Արվեստի ոլորտը, սակայն, միշտ չէ, որ պատրաստ է երես տալ մեծ հոնորարներով: Ֆրիլանս-նկարիչները խոստովանում են, որ ոչ կայուն վարձատրությունն իրենց լարված է պահում: Վաղվա օրվա վրա վստահ չլինելն անպայման սթրեսներ է առաջացնում և բացասական էմոցիաների հիմք դառնում: Ստուդիայում աշխատելիս նկարիչը մշտապես շնչում է ներկերի թունավոր պիգմենտները, որոնք ոչ միայն թունավորման պատճառ կարող են դառնալ, այլև ազդել ուղեղի աշխատանքի վրա:

Կիբերմարզիկ

Խաղերի արդյունաբերությունը նպատակադրված ձևով շրջադարձեր է գրանցում: Եթե նախկինում ոչ ոք չգիտեր, որ խաղային կերպարները կարող են մրցույթների մասնակցել, ապա այսօր թիմերի մրցույթներին հետևում է ավելի քան 145 մլն մարդ: Սակայն եթե դուք որոշել եք կիբերմարզիկի կարիերա սկսել, ապա պատրաստ եղեք, որ օրվա մեջ 12 ժամ պետք է անցկացնեք համակարգչի առջև: Խաղային տարածքում մշտական ներկայությունը ոչ միայն առողջական վիճակի վրա է ազդում, այլև հոգեկան աշխարհի: Իրականությունը փոխարինած համակարգչային պատկերներից հետ վարժվելը դժվար կլինի:

Փաստաբան

Փաստաբանի կարիերան ևս ժամանակի ընթացքում զգալի հետք է թողնում անձի վրա: Ավելորդ զգուշավորությունը, խստությունն ու մանրուքներին ուշադրություն դարձնելը այն գործոններն են, որոնք անհրաժեշտ են գործի հաջող վարման համար: Մարդիկ պաշտպանության համար դիմում են փաստաբանին, ով ոչ միայն լավ մասնագետ պետք է լինի, այլև լավ հոգեբան, իսկ պաշտպանյալների հետ զրույցները միշտ չէ, որ հարթ են անցնում: Աշխատանքային կոնֆլիկտներին մասնակցությունը փչացնում է նյարդային համակարգը և օրգանիզմի իմունային պաշտպանության համակարգը վատացնում: Երբեմն փաստաբանները սպառնալիքներ ու զայրացած նամակներ են ստանում, իսկ դա ահաբեկմանը և անտարբերությանը հանգեցնող ուղիղ ճանապարհ է: Մասնագետը չի դադարում աշխատել նաև գրասենյակի սահմաններից դուրս:

PR-մասնագետ

Գովազդը արդի աշխարհի շարժիչ ուժն է, այդ պատճառով PR-մասնագետները պահանջված են առավել, քան երբևէ: Նախագծերն առաջ տանելը ամենահեշտ գործերից չէ. կատաղի մրցակցություն, տեղեկատվության մեծ ծավալներ՝ այս ամենը բաղադրիչներն են այն ապուրի, որի մեջ մշտապես եփվում է PR-մասնագետը: Զարգացնող նախագծերի հետ աշխատանքը հետաքրքիր է, բայց սթրեսային. դա և չկարգավորված աշխատանքային օրն է, և պատվիրատուների հետ կոնֆլիկտային իրավիճակները, և վայրկենական լուծում պահանջող հարցերը:

Մարզիկ

Արհեստավարժ մարզիկները պարտավոր են ոչ միայն ամենօրյա ֆիզիկական ծանրաբեռնվածությունը հաղթահարել, այլև մրցակիցների ճնշումը, ինչպես նաև սեփական էմոցիաների հետ կռիվ տալ: Առաջնություններում ելույթ ունենալը պահանջում է կարգապահություն, հոգեկան ամրություն: Մշտական մրցումները մարդու մեջ մրցակցության ոգին են արթնացնում՝ ատլետը սովորական կյանքում էլ է ձգտում լինել առաջինը: Բացի այդ՝ մարզիկի խոսքից է կախված նաև այն ակումբի կամ կազմակերպության հեղինակությունը, որը նա ներկայացնում է, ուստի նա պետք է հետևի իր խոսքին ու քայլերին:

Ոճաբան

Քիմիական նյութերը, որոնցով ամեն օր աշխատում է ոճաբանը, ժամանակի հետ կարող են ալերգիկ ռեակցիաներ առաջացնել: Իսկ ոտքի վրա, այն էլ՝ անհարմար դիրքում, անցկացված տարիներից հետո սկսում են ցավել թե մեջքը, թե ծնկները, կարող է նաև միգրեն առաջանալ: Բազմաթիվ այցելուներ գալիս են գեղեցկության սրահ՝ ոչ միայն նոր սանրվածքի, այլև հոգեբանական աջակցության համար՝ ոճաբանի բազկաթոռն ընդունելով իբրև թերապևտի աթոռ: Այդպիսի ամենօրյա թրեյնինգները կարող են հանգեցնել սթրեսի ու էմոցիոնալ ճնշվածության, որովհետև ամեն վարպետ չէ, որ պատրաստ է լսել ուրիշի դժգոհությունները: