Հայ կինոյի հայտնի «վառեմ-մարեմ»-ի շենքը փլուզվում է․օրակարգում է հայտնվել վերակառուցման նոր նախագիծ

«Մեր մանկության տանգո» ֆիլմով հավերժացած  հայտնի դրվագը  Գալյա Նովենցի ու Մհեր Մկրտչյանի կերպարներով փոխեց շենքի  անունը։ Բոլորն այն ճանաչում են որպես «վառեմ-մարեմ»-ի  բալկոնով շենք:Պատկանել է ալեքպոլցի հայտնի առևտրականներ Աբովյաններին  ու Խոյեցյաններին:Խորհրդային տարիներին շենքի մի հատվածում գործել է նաև ռուսական բանակի փոստային բաժանմունքը:

Քաղաքի հարուստ պատմության թանկ ժառանգությունը   վտանգված է: Գյումրիի Աճեմյան փողոցի, «Կումայրի» պատմամշակութային արժեք արգելոց-թանգարանի կառույցը փլուզվում է։  Նրբաոճ զարդաքանդակներով արտաքին պատերին  հսկայական ճաքեր են, կամարաձև թռիչքներով  ներքին միջսենյակային պատերն արդեն  ամբողջությամբ փլուզված են : Տանիքն ու  առաստաղն էլ չկան, փայտյա գերանները թալանել են ՝ կտրել -տարել ։

Շենքի փրկության  խնդրանքով տարբեր գերատեսչությունների տասնյակ նամակներ են ուղարկվել,խոստումներ ու նախագծեր շատ են եղել,բայց դրանք  այդպես էլ իրականություն չեն դարձել:Շենքը «Կումայրի» արգելոց-թանգարանի հաշվեկշռում է, բայց համայնքային ենթակայության չէ: Դեռ 2009 թվականից վերականգնելու և մշակութային նշանակության  կենտրոն օգտագործելու պայմանով ավագանու որոշմամբ նվիրաբերվել է կառավարությանը`ի դեմս Մշակույթի նախարարությանը։

«12 տարի առաջ էս շենքը համեմատաբար լավ վիճակում էր, քան  թե հիմա, էգուց ավելի վատ վիճակում  կլինի, քան թե  այսօր։ Իհարկե տնօրինողի մեղքն է, էդ հանրային հարստությունը վերցրել եք, որ նորոգեք,վերականգնեք,թանգարան տեղավորեք, բայց չեք արել, շենքն էլ շարունակել է մաշվել»-ասում է Գյումրիի ավագանու անդամ Լևոն Բարսեղյանը։

Տնօրինող գերատեսչությունից   պահպանության հարցի շուրջ պարզաբանում են տվել՝ նշելով , որ շենքի պահպանությունը համայնքի խնդիրն է, իսկ քաղաքապետարանը դա իր   լիազորությունը չի համարում ։

«Օրենքն ասում է, որ տեղական ինքնակառավարման մարմինները պարտավոր են զբաղվել իրենց տարածքում գտնվող  հուշարձանների պահպանությամբ, այսինքն՝ համայնքապետարանը պետք է դրանով զբաղվեր, մենք նման օրինակներ ունեցել ենք»,-Shantnews.am-ի հետ զրույցում  նշել  է ԿԳՄՍ նախարարության հուշարձանների վերականգնման բաժնի գլխավոր մասնագետ Լուսինե Իգիթյանը։

«Ոչ,պատմամշակութային շենքերի  պահպանության և օգտագործման բոլոր իրավունքները սեփականատիրոջն է,համայնքն  ունի իր լիազորությունների չափը ավելի շատ պահանջելու, որպեսզի  իր տարածքում պահպանեն էդ շենքերը, ոչ թե ինքը պահպանի»,- նշել է Գյումրիի գլխավոր ճարտարապետ Հենրիկ Գասպարյանը։

Շենքի վերակառուցման համար  այժմ  նոր նախագիծ է ներկայացվում։Այն քննարկվել է կառավարությունում, որից հետո  նախարարությունը դիմել է Գյումրիի ավագանուն՝  2009 թվականի որոշման մեջ փոփոխություն կատարելու  խնդրանքով, որպեսզի շենքը  «Հայաստանի ազգային պոլիտեխնիկական համալսարան» հիմնադրամին հատկացվի նաև կրթական նպատակներով ։

«Նվիրաբերության մեջ պայման էր գրվել, որ պետք է շենքը անպայման վերակառուցվեր  և օգտագործվեր  մշակութային նպատակներով, սակայն ծրագիրը չիրականացվեց։Մշակույթի նախարարությունը  նորից դիմեց համայնքին ,որպեսզի  էդ  պայմանը փոխենք և նպատակը ոչ թե մշակութային լինի, այլ նաև կրթական»,-պարզաբանել է գլխավոր ճարտարապետը ։

Շենքի հատկացման մասին վերջնական որոշում դեռ չկա, միայն փոխվել է  օգտագործման  նպատակը, որն էլ  հետագայում թույլ կտա ԿԳՄՍ  նախարարությանը շենքը  հատկացնել Ազգային պոլիտեխնիկական համալսարանին նաև տեխնոկենտրոն օգտագործելու  նպատակով։ Քաղաքի գլխավոր ճարտարապետն էլ հավաստիացնում է, որ  հերթական  նախագիծը   չիրականացնելու դեպքում պատրաստ են  նվիրատվությամբ հանձնված գույքը ետ պահանջել ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։