Զբաղվածության կենտրոնները գործազուրկ երիտասարդների համար իրականացնում են մասնագիտական որակավորման և պրակտիկ աշխատանքի ծրագրեր

Զբաղվածության տարածքային  կենտրոնների  երիտասարդության զբաղվածության ապահովմանն ուղղված ծրագրերում առաջնահերթություն է դրված մասնագիտական որակավորմանը, աշխատանքային փորձի ձեռք բերմանը։ Մասնագիտական  եռամսյա պրակտիկան տարբեր ոլորտների ընկերություններում հնարավորություն է տալիս նաև տեղում կայուն վարձատրվող աշխատանք գտնել։ Այս ծրագրով, միայն 2020 թվականին, հաջողվել է  2821 երիտասարդ գործազուրկների մշտական աշխատանքի անցնել։

Ազնիվը Շիրակի պետական համալսարանի նախորդ տարվա շրջանավարտ է, մասնագիտությամբ կենսաբան-մանկավարժ է: Անկեղծանում է՝ մանկավարժությամբ զբաղվել  ու դպրոցում դասավանդել չի ցանկանում, ավելի շատ հետաքրքրված է բուսաբուծության ոլորտով: Զբաղվածության տարածքային կենտրոնի ծրագրով մասնագիտական պրակտիկա է անցնում Գյումրիի սելեկցիոն կայանի գիտական բաժնում:

«Միշտ ցանկացել եմ  հենց գիտության ոլորտում աշխատել և գիտնական դառնալ, դա էլ երևի հենց նպաստեց, որ պրակտիկաս անցնեմ այստեղ»,- ասում է երիտասարդ կենսաբան Ազնիվ Գրիգորյանը։

Սելեկցիոն կայանի գիտական բաժնի կրտսեր գիտաշխատող է համարվում նաև 27 տարեկան  Նարեկը։ Նա գործարար վարչարարություն մասնագիտական դիպլոմով մագիստրոս է: Աշխատանք շատ է փնտրել ու բախվել նույն խնդրին, ինչ մյուս մասնագիտությունների դեպքում է՝ գործատուն աշխատանքային փորձ է պահանջել։

«Հիմնական խնդիրը, որին բախվել եմ, բավարար աշխատանքային փորձ չունենալն է եղել, որոշ տեղեր պահանջել են երկու տարվա աշխատանքային փորձ, որոշ տեղերում՝ ավելի շատ։ Էստեղի գործնական աշխատանքը ամբողջովին նորույթ էր ինձ համար, որովհետև կոնկրետ  բուսաբուծության ոլորտում ես չէի ունեցել պրակտիկա, հիմա սա լավագույն առիթ է  փորձ ձեռք բերելու համար»,- ասում է  կրտսեր գիտաշխատող Նարեկ Բաղդասարյանը։

Գյումրիի սելեկցիոն կայանում երիտասարդ մասնագետների կարիք շատ ունեն: Գիտական բաժնում խրախուսում են նոր կադրերի ներգրավվածությունը: Այստեղ սերնդափոխությունը համարում են կարևոր ու բնականոն գործընթաց, ինչից կշահի գիտությունը։

Աշխատանքային փորձ ձեռք բերելու, աշխատաշուկայում մրցունակ դառնալու խնդիրն է լուծում զբաղվածության տարածքային կենտրոններում ներդրված այս ծրագիրը, որի կարևոր բաղադրիչն է գործազուրկ երիտասարդների համար եռամսյա գործնական պրակտիկան, իսկ լավագույն արդյունքը լինում է այն, որ նրանք աշխատանքի են անցնում իրենց նախընտրած ոլորտներում:

Գյումրիից նախորդ և այս տարի ծրագրում ընդգրկված են եղել մոտ 50 շահառուներ: Երիտասարդ գործազուրկին պրակտիկայի ընթացքում վճարվում է աշխատավարձ` նվազագույն աշխատավարձի չափով, գործատուին՝ գումար  այդ աշխատավարձից բխող հարկային և այլ ծախսերը կատարելու համար, իսկ պրակտիկան կազմակերպող մասնագետին ՝ ամսական գումար նվազագույն աշխատավարձի 50%-ի չափով։

«Ծրագրի կայուն զբաղվածության ցուցանիշը շատ բարձր է, շահառուների գրեթե 77 տոկոսը պրակտիկայից հետո անցնում է կայուն վարձատրվող աշխատանքի։ Մարզերում շատ մեծ է բժիշկների, բուժաշխատողների պահանջարկը, անգամ մայրաքաղաքում կա դեղագետների պահանջ։ Պահանջարկը մեծ է նաև մեծածախ և մանրածախ առևտրի ոլորտում, վաճառողների, գանձապահների, ինչպես նաև մասնագիտություն չունեցող բանվորների կարիք շատ կա»,- SHANTNEWS.am-ի հետ զրույցում նշել է զբաղվածության պետական գործակալության տեղեկատվության ապահովման բաժնի պետ Ցողիկ Բեժանյանը։

Գործազուրկ երիտասարդների համար պրակտիկ գործունեության ապահովումից բացի, կա մեկ այլ ծրագիր ևս, այն   վերամասնագիտացման  ուղղությամբ է։ Հնարավորություն է տրվում երիտասարդին փոխել մասնագիտության պրոֆիլը և ձեռք բերել շուկայի պահանջարկին համապատասխան աշխատանք։ Գյումրիում, օրինակ, կարող բանվորներից բացի, սպասարկման ոլորտում բարձրակարգ  բարմենների, մատուցողների ու խոհարարների են աշխատանք առաջարկում։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։