ԿՀՎ-ն մինչև 2040 թ.-ը նոր համաշխարհային պատերազմ է կանխատեսել

Առաջիկա տասնամյակների ընթացքում աշխարհին սպառնում է գլոբալ ռազմական հակամարտության՝ կապված մոլորակի վրա կլիմայի փոփոխության հետ։ РИА Новости գործակալության փոխանցմամբ՝ այս մասին նշված է ԱՄՆ-ի Կենտրոնական հետախուզական վարչության (ԿՀՎ) հրապարակված զեկույցում։

«Կլիմայի փոփոխության աճող ֆիզիկական հետևանքները կարող են սրել անդրսահմանային աշխարհաքաղաքական թեժ կետերը, քանի որ պետությունները քայլեր են ձեռնարկում իրենց շահերը պաշտպանելու համար», – նշվում է փաստաթղթում։

Ըստ հեղինակների՝ ամենաուշը 2040 թվականին աշխարհում կսկսվեն «կլիմայական բախումներ», որոնց ժամանակ կողմերը միմյանց դեմ կկիրառեն այնպիսի տեխնոլոգիաներ, որոնք ուժեղացնում են բնական աղետները, ինչպիսիք են երաշտը և ջրհեղեղը։ Խոսքն առաջին հերթին գեոինժեներական տեխնոլոգիաների մասին է։

Փորձագետները նաև նախազգուշացրել են երկրների միջև լարվածության աճի մասին ՝ կապված Փարիզի կլիմայի համաձայնագրի իրականացման շուրջ ծագած վեճերի պատճառով. այդ համաձայնագիրը ենթադրում է ջերմոցային գազերի արտանետումների նվազեցում գլոբալ տաքացումը կանխելու համար:

«Շատ երկրներ կանգնելու են տնտեսական դժվարին ընտրության առջև և, ամենայն հավանականությամբ, ապավինելու են տեխնոլոգիական առաջընթացին` հետագայում արտանետումները արագորեն նվազեցնելու համար: Չինաստանը և Հնդկաստանը կարևոր դերակատարում կունենան ջերմաստիճանի բարձրացման հետագիծը որոշելու հարցում»,- ասվում է փաստաթղթում:

Բացի այդ, զեկույցի հեղինակները հայտնել են կլիմայի փոփոխության հետևանքների պատճառով զարգացող երկրներում ներքին հակամարտությունների վտանգի մասին, քանի որ այդ պետություններն ավելի քիչ են կարողանում հարմարվել նոր պայմաններին:

Կլիմայական պատերազմի ապագա հնարավոր թեժ կետերը ներառում են այնպիսի շրջաններ, ինչպիսիք են Կոնգո, Ինդոս, Մեկոնգ և Նեղոս գետերի ավազանները: Հակամարտություններ այնտեղ կարող են առաջանալ գետերի հուների փոփոխության և ջրային հոսքերի ուղղությունը փոխելու պատճառով:

Զեկույցում թվարկված են 11 երկրներ, որոնց վրա ամենաշատը կազդեն կլիմայի գլոբալ փոփոխության բացասական հետևանքները։ Վերլուծաբանների կարծիքով՝ այս պետությունները կարող են ծայրահեղ քայլերի գնալ՝ հանուն գոյատևման։ Խոսքը, մասնավորապես, միջուկային զենք ունեցող Չինաստանի, Հնդկաստանի և Պակիստանի, ինչպես նաև Աֆղանստանի, Հյուսիսային Կորեայի, Մյանմայի և Կենտրոնական և Հարավային Ամերիկայի մի շարք երկրների մասին է։