Ադրբեջանը խախտել է հայ գերիների կյանքի իրավունքը․ ՄԻԵԴ-ը վճիռ է հրապարակել

Մարդու իրավունքների եվրոպական դատարանն այսօր՝ նոյեմբերի 4-ին, հրապարակել է 2014 թվականին Ադրբեջանում գերեվարված և խոշտանգված, Տավուշի մարզի Վերին Կարմիրաղբյուր գյուղի բնակիչ Մամիկոն Խոջոյանի և Չինարի գյուղի բնակիչ Կարեն Պետրոսյանի գործերով վճիռները:

ՄԻԵԴ-ը վճռել է, որ Բաքուն խախտել է հայ գերիների կյանքի իրավունքը, խոշտանգումներից, խտրականությունից զերծ մնալու, ազատության և անվտանգության, անձնական անձեռնմխելիության, արդյունավետ բուժում ստանալու իրավունքները:

ՄԻԵԴ-ը պարտավորեցրել է Բաքվին յուրաքանչյուր գործով վճարել 40 հազարական եվրո:

ՄԻԵԴ-ի հրապարակած փաստաթղթում նշվում է, որ գերեվարված Մամիկոն Խոջոյանը գերեվարվել էր 2014 թվականի հունվարի 28-ի առավոտյան՝ Ադրբեջանի հետ սահմանին։ Ադրբեջանական լրատվամիջոցները ներկայացրել էին նրան՝ որպես հայ զինված դիվերսիոն խմբի զինված ուղեկցորդ և ձերբակալել։ Տասը շաբաթ անց՝ 2014 թվականի մարտի 4-ին նա վերադարձվել էր հայրենիք։

Հիշեցնենք՝ հայրենիք վերադառնալուց որոշ ժամանակ անց 77-ամյա Մամիկոն Խոջոյանը մահացել էր: Դատաբժշկական փորձաքննությունը ցույց էր տվել, որ Խոջոյանի մահվան պատճառը եղել է օրգանիզմի ընդհանուր ինտոքսիկացիան:

Իսկ 1981 թվականին ծնված, Չինարի գյուղում բնակվող Կարեն Պետրոսյանը, 2014 թվականի օգոստոսի 7-ին մոլորվել էր, հատել Ադրբեջանի հետ սահմանը և գերեվարվել Ադրբեջանի զինված ուժերի կողմից։ Նա մահացել էր գերության մեջ։ Ադրբեջանական կողմը հայտարարել էր, որ նա մահացել է սրտի կաթվածից։ ՄԻԵԴ-ի հրապարակած փաստաթղթում նշվում է, որ բողոք ներկայացնող կողմը՝ Կարեն Պետրոսյանի հայր Արտուշ Պետրոսյանը, բողոքել է, որ իր որդին խոշտանգվել է և սպանվել անօրինական ձերբակալության ժամանակ, նրա մարմինը ժամանակին չի վերադարձվել, դեպքի առնչությամբ չի իրականացվել պատշաճ հետաքննություն և նրա դեմ ենթադրյալ բռնությունները տեղի են ունեցել էթնիկ ծագման վրա հիմնված խտրականության արդյունքում։

Հիշեցնենք՝ Բաքուն Կարեն Պետրոսյանի աճյունը հայկական կողմին էր փոխանցել 2014-ի հոկտեմբերին՝ փորձելով թաքցնել բռնության հետքերը: