Բելառուսն ու ԵՄ-ն քննարկել են Լեհաստանի հետ սահմանին տիրող իրավիճակը

Բելառուս-Լեհաստան սահմանին տիրող իրավիճակի հարցով շփումներ են կայացել ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի և Բելառուսի արտգործնախարար Վլադիմիր Մակեյի միջև։

Բորելը Twitter-ի իր էջում հայտնել է, որ մարդկանց կյանքը հարկավոր է պաշտպանել։

«Խոսել եմ Բելառուսի արտգործնախարար Մակեյի հետ ԵՄ սահմանին մարդասիրական վտանգավոր իրավիճակի շուրջ։ Մարդկանց կյանքը հարկավոր է պաշտպանել և թույլ տալ մարդասիրական կազմակերպությունների մուտքը տարածք։ Առկա իրավիճակն անընդունելի է, և դրան հարկավոր է վերջ դնել։ Մարդիկ չպետք է օգտագործվեն որպես զենք», – գրել է Բորելը։

Spoke to #Belarus Foreign Minister Makei to raise the precarious humanitarian situation at the border with the EU. Peoples lives must be protected and humanitarian agencies allowed access.

The current situation is unacceptable and must stop. People should not be used as weapons.

— Josep Borrell Fontelles (@JosepBorrellF) November 14, 2021

Իր հերթին ԵՄ բարձր ներկայացուցչի հետ զրույցում Մակեյն ընդգծել է, որ պատժամիջոցներն անարդյունավետ են, նաև հայտնել է ձեռնարկվող քայլերի մասին։

«Մակեյը զրուցակցին հայտնել է այն քայլերի մասին, որ Բելառուսը ձեռնարկում է Ասիայի, Աֆրիկայի և Մերձավոր Արևելքի երկրներից ներգաղթյալների հոսքը կրճատելու, սահմանին գտնվող փախստականներին մարդասիրական օգնություն տրամադրելու և այդ հարցի շուրջ ՄԱԿ-ի համապատասխան միջազգային կազմակերպությունների հետ փոխգործակցության մասին», – նշված է Բելառուսի ԱԳՆ-ի հայտարարությունում։

Այս ընթացքում Լեհաստանի հետ սահմանին գտնվող ներգաղթյալների շրջանում լուրեր են տարածվել, թե Գերմանիայից ավտոբուսներ են եկել՝ իրենց տանելու, հաղորդում է BBC-ի ռուսական ծառայությունը։ Ըստ Լեհաստանի Ներքին գործերի նախարարության՝ այդ լուրերը սուտ են և նպատակ ունեն ներգաղթյալներին դրդել ճեղքել սահմանային պատնեշը։

Aktualna sytuacja w Kuźnicy. Wszystkie nasze służby są w gotowości.

📣 Przez głośniki nadawane są komunikaty w kilku językach. pic.twitter.com/kMu6Y4M0Nc

— MSWiA 🇵🇱 (@MSWiA_GOV_PL) November 14, 2021

Հիշեցնենք՝ Բելառուս-Լեհաստան սահմանին Մերձավոր Արևելքից եկած հազարավոր միգրանտներ են հավաքվել՝ հույս ունենալով անցնել Եվրոպա։