Ո՞ւր է գնացել հավելյալ 56 մլն խմ ջուրը. Հայկ Բաբուխանյան

Խորհրդարանի օգոստոսի 29-ի արտահերթ նիստում Սևանա լճից լրացուցիչ ջրառ իրականացնելու հարցի քննարկման ժամանակ ԱԺ ՀՀԿ խմբակցության անդամ Հայկ Բաբուխանյանը դիմեց հիմնական զեկուցող, Ջրային պետական կոմիտեի նախագահ Ինեսա Գաբայանին: Պատգամավորն ասաց, որ խիստ դժգոհ է քննարկման այն ձևից, որը տեղի է ունենում, քանի որ իրենք այստեղ խոսում են և հարցեր բարձրացնում պատասխաններ ստանալու համար, սակայն ինքը ոչ երեկ՝ հիմնական զեկուցողի եզրափակիչ խոսքում, ոչ այսօր չլսեց իր տված այն հարցերի պատասխանները, որոնք վերաբերում են օրենքի նախագծին:

Բաբուխանյանը հայտնեց, որ հանդիպել է Կոտայքի մարզի գյուղացիների հետ, Արարատի, Արտաշատի, Մասիսի գյուղացիների հետ, համոզվել՝ գյուղացիները ոռոգման ջրի պակասի պատճառով վնաս են կրել, ուստի պետք է այդ վնասը փոխհատուցել: Պատգամավորը հետաքրքրվեց՝ եթե այս տարի 56 մլն խմ ջուր ավելի է ծախսվել, սակայն նույն ցանքատարածություններն են, ո՞ւր է գնացել այդ հավելյալ 56 մլն խմ ջուրը:

Նա առաջարկեց ստեղծել քննիչ հանձնաժողով՝ հարցն ուսումնասիրելու համար:

ԱԺ ՀՀԿ խմբակցության մեկ այլ անդամ Արայիկ Հովհաննիսյանը նշեց, որ երեկ եղել են բազմաթիվ հարցադրումներ, առաջարկներ, սակայն հետո՝ քննարկումների արդյունքում, այլ որոշում կայացվեց, այն է՝ հաշվի առնելով հարցի կարևորությունը, հրատապությունը՝ այս պահին ձեռնպահ են մնում առաջարկներ ներկայացնելուց, որպեսզի չխանգարեն այս առանց այդ էլ սուր իրավիճակում:

«Մենք առաջարկները չեն ներկայացրել, որպեսզի հնարավորություն տանք Կառավարությանը՝ այս օրենքի նախագիծն ընդունելուց հետո համապատասխան գործողություններ կատարել, մենք նաև պայմանավորվածություն ունենք գործադիրի հետ՝ աշխատանքային կարգով ևս շարունակել քննարկումները, չսպասել լսումներին, քանի որ կան խնդիրներ՝ խմբագրական, իրավական, տեխնիկական»,- ասաց պատգամավորը:

Ջրային պետական կոմիտեի նախագահ Ինեսա Գաբայանը պատգամավորներին շնորհակալություն հայտնեց իրավիճակը ճիշտ գնահատելու համար, խոստացավ՝ բարձրաձայնված հարցերին պատասխաններ կպատրաստեն, սակայն դեռ վերջնական թվեր չեն կարող ներկայացնել, քանի դեռ հավելյալ ջրառի վերջնական ծավալ չունեն` ասում են մինչև 40 մլն խմ, բայց, գուցե, 25 մլն խմ-ով բավարարվեն: Գաբայանը նաև հայտնեց, որ իրենք պատրաստ են համագործակցության բոլոր առաջարկները քննարկել: