Հայաստան-Հնդկաստան հարաբերությունների ներկա իրավիճակն ու զարգացման հեռանկարները. քննարկում խորհրդարանում

ՀՀ ԱԺ նախագահի տեղակալ, Հայաստան-Հնդկաստան բարեկամական խմբի ղեկավար Հակոբ Արշակյանի նախաձեռնությամբ մարտի 15-ին տեղի է ունեցել աշխատանքային քննարկում Հայաստանի եւ Հնդկաստանի միջեւ հարաբերությունների զարգացման ու խորացման թեմայով:

Քննարկմանը մասնակցել են խորհրդարանական բարեկամական խմբի անդամներն ու գործադիրի համապատասխան կառույցների եւ գերատեսչությունների ներկայացուցիչներ:

Ողջունելով մասնակիցներին խորհրդարանում՝ Հակոբ Արշակյանը նշել է, որ համատեղ քննարկման նպատակն է օրենսդիրի եւ գործադիրի սերտ համագործակցությունը՝ ի նպաստ հայ-հնդկական հարաբերությունների զարգացման:

ՀՀ արտաքին գործերի նախարարի տեղակալ Մնացական Սաֆարյանը, ելույթում անդրադառնալով Հայաստան-Հնդկաստան հարաբերություններին, նշել է, որ վերջին տարիներին Հնդկաստանի հետ հարաբերությունները թեւակոխել են ինտենսիվ զարգացման փուլ: Նա ընդգծել է, որ հայ-հնդկական հարաբերությունների զարգացման խորացումն ու առաջընթացը Հայաստանի արտաքին քաղաքական առաջնահերթություններից է, որն ամրագրված է Կառավարության ծրագրում. քաղաքական երկխոսության մակարդակում զգալի առաջընթաց է գրանցվել: Հայ-հնդկական հարաբերությունների զարգացման հարցում կարեւորվել է նաեւ միջխորհրդարանական համագործակցությունը:

Քննարկվել են նաեւ առեւտրատնտեսական ոլորտում հարաբերությունների զարգացման հնարավորությունները: Անդրադարձ է կատարվել մշակույթի ոլորտում համագործակցությանն ու միմյանց մշակույթների նկատմամբ հետաքրքրության բարձրացման ու մշակութային արժեքների հանրահռչակմանը նվիրված ծրագրերի իրականացմանը:

Խոսելով մշակույթի ոլորտում համագործակցության մասին՝ ներկայացվել են հայ նկարիչ Սարգիս Խաչատուրյանի Աջանտայի քարանձավների որմնանկարների գործերը, որոնք մեծ հետաքրքրություն կարող են առաջացնել ոչ միայն օտարերկրացիների, այլեւ մեր հանրության համար՝ ընդգծելով հայ ժողովրդի հետաքրքրվածությունը հին ժողովուրդների մշակույթով եւ պատմությամբ: Կարեւորվել է համագործակցությունը ֆիլմարտադրության ոլորտում, զբոսաշրջության զարգացման հարցում եւ միջմարդկային շփումների խթանման ուղղությամբ:

Մտքերի փոխանակման ձեւաչափում պատգամավորները կարեւորել են զբոսաշրջության եւ ֆիլմարտադրության, առողջապահության, միգրացիայի ոլորտներում համագործակցությունը, առեւտրաշրջանառության ծավալների մեծացման անհրաժեշտությունը:

Մասնակիցներն անդրադարձել են նաեւ տարածաշրջանային հաղորդակցության ուղիների զարգացման ծրագրերում ՀՀ ներգրավվածության եւ ՀՀ կողմից առաջ քաշված «Խաղաղության խաչմերուկ» ծրագրին առնչվող հարցերի:

Ամփոփելով քննարկումը՝ ԱԺ նախագահի տեղակալ Հակոբ Արշակյանը նշել է, որ բոլոր ջանքերը պետք է ներդրվեն Հնդկաստանի հետ հարաբերությունների զարգացման հարցում՝ համոզմունք հայտնելով, որ բավարար ջանքեր գործադրելու դեպքում կարձանագրվեն իրատեսական արդյունքներ: Ծրագրերի իրականացման հարցում Հակոբ Արշակյանն աջակցելու պատրաստակամություն է հայտնել:

Պայմանավորվածություն է ձեռք բերվել առաջիկայում եւս կազմակերպել նմանատիպ քննարկումներ: