«Երիտասարդ խորհրդարան» ծրագրի շրջանակում գումարվել են հանձնաժողովների նիստեր

«Երիտասարդ խորհրդարան» ծրագրի շրջանակում ձեւավորված երեք՝ Գիտության, կրթության, մշակույթի, սփյուռքի, երիտասարդության եւ սպորտի, Տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության ու Տնտեսական հարցերի մշտական հանձնաժողովներն օգոստոսի 29-ին հրավիրել են նիստեր: Այս մասին տեղեկացնում են ԱԺ-ից։

«ՀՀ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը, ողջունելով «Երիտասարդ խորհրդարանի» պատգամավորներին, կարեւորել է պատանիների ներգրավվածությունը նմանօրինակ միջոցառումներում՝ ընդգծելով, որ թեեւ ապրում ենք խորհրդարանական երկրում, բայց խորհրդարանի նկատմամբ բնակչության վստահությունն ու խորհրդարանի գործունեության վերաբերյալ տեղակատվությունը ցածր մակարդակի վրա են: Բաբկեն Թունյանը երիտասարդներին պատմել է հանձնաժողովի աշխատանքների մասին՝ նշելով, որ հանձնաժողովների բարդ ու պատասխանատու աշխատանքները երբեմն ուշադրությունից դուրս են մնում:

Զեկուցող Լաուրա Թորոսյանը ներկայացրել է երիտասարդների հեղինակած օրենքի նախագիծը, որը վերաբերում է բարձրագույն ուսումնական հաստատություններում հավասար կրթության հնարավորությանը: Բանախոսը նշել է, որ օրինագծով առաջարկվում է ստեղծել կայուն ֆինանսական կենտրոն՝ ֆոնդ, որը կկառավարվի ԿԳՄՍ նախարարության կողմից, կապահովվի ուսուցման հավասար հնարավորություն բոլոր ուսանողների համար՝ անկախ նրանց ֆինանսական վիճակից, միեւնույն ժամանակ, այն նպատակ ունի զարգացնելու կրթական համակարգը: Առաջարկվում է ներդնել նաեւ ուսման ամսական վճարի հետվճարային համակարգ:

Քննարկման ընթացքում պատգամավորը հարցերի միջոցով խորհուրդներ է տվել երիտասարդներին իրենց կողմից ներկայացված օրենսդրական նախաձեռնության վերաբերյալ:

Տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության մշտական հանձնաժողովի օրակարգում էր ««Սեւանա լճի մասին» օրենքում լրացումներ եւ փոփոխություններ կատարելու մասին» օրենքի նախագծի քննարկումը:

Առաջարկվել է արտադրել հատուկ ֆիլտրեր՝ Սեւանա լճի ափամերձ տարածքներում գտնվող ռեստորանների եւ հյուրանոցների համար, որոնց գործարկումը հնարավորություն կտա ֆիլտրել Սեւանա լիճ թափվող ջուրը:

Երիտասարդների հետ քննարկմանը մասնակցել եւ խորհուրդներ է տվել ՀՀ ԱԺ պատգամավոր Մարինա Ղազարյանը:

ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի երիտասարդ անդամները ներկայացրել են ««Լեզվի մասին» օրենքում լրացումներ կատարելու մասին» օրենքի նախագիծը:

Հայերենի տարածմանն ու պահպանմանն ուղղված նախագիծը ենթադրում է սփյուռքում հայագիտության պահպանություն:

Երիտասարդներին ողջունել, իրենց փորձով կիսվել եւ առաջարկվող նախաձեռնությունը քննարկել են ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Սիսակ Գաբրիելյանը եւ հանձնաժողովի անդամ Հասմիկ Հակոբյանը:

Երիտասարդների առաջարկած օրենքների նախագծերը հանձնաժողովներում ստացել են դրական եզրակացություններ»,-ասված է հաղորդագրության մեջ: