ԱլԳ երկրների քաղհասարակության ֆորումի հրավերները դեռ ուղարկված չեն. Ադրբեջանում ինչո՞ւ են խուճապի մեջ

Ադրբեջանական լրատվամիջոցները վերջին օրերին «ահազանգում են», որ իրենց երկրի ղեկավարությունը հրավիրված չէ «Արևելյան գործընկերության» երկրների քաղաքացիական հասարակության ֆորումին, որն անցկացվելու է դեկտեմբերի 10-12-ը Վրաստանի մայրաքաղաք Թբիլիսիում: Միևնույն ժամանակ, ընդգծում էին, որ ՀՀ վարչապետի պաշտոնակատար Նիկոլ Փաշինյանն ու ԱԳ նախարարի պաշտոնակատար Զոհրաբ Մնացականյանը պատվավոր հյուրերի շարքում են:

Եվրամիության Արևելյան գործընկերության քաղաքացիական պլատֆորմի նախկին համակարգող Բորիս Նավասարդյանը SHANTNEWS.am-ի հետ զրույցում նշեց, որ հայտնի չէ` որտեղից են նրանք գտել այդ նախնական փաստաթղթերը, որոնք դեռ վերջնականացված չէին, նույնիսկ շատ հրավերներ դեռ ուղարկված չեն ո՛չ իրենց, ո՛չ որևէ մեկին:

«Դա, իհարկե, հավաստի աղբյուրից չէ, բնականաբար, Արևելյան գործընկերության բոլոր երկրների իշխանությունների ներկայացուցիչները հրավիրվելու են համապատասխան պանելների մասնակցելու համար, ուղղակի նախնական քննարկումների, կոնտակտների փուլ է, որովհետև ուղարկում են պաշտոնական հրավերներ արդեն նրանց, ովքեր գոնե նախնական համաձայնություն տվել են: Առայժմ այդ կարգի կոնսուլտացիաներ էին ԵՄ պաշտոնական կառույցների, նաև համապատասխան կառավարությունների միջոցով, այնպես որ շատ նախնական տվյալների վրա ինչ-որ հետևություններ են արել: Ֆորումի ղեկավար կոմիտեի կողմից համապատասխան հայտարարությունն արդեն կա, այն կարելի է տեսնել ֆորումի կայքում»,- ասաց նա:

Նավասարդյանը հայտնեց, որ դեռևս Հայաստանի ներկայացուցիչներն էլ չեն հաստատել իրենց մասնակցությունը, պարզապես եղել է նախնական կոմունիկացիա այդ թեմայով, բայց իրենցից որևէ պաշտոնական պատասխան չկա: Նա նշեց, որ ֆորումի օրակարգը վերջնականապես կհաստատվի, երբ կլինեն հրավիրյալների կողմից պատասխանները, իսկ առայժմ աշխատանքային տարբերակ է, որն ամեն օր, կարելի է ասել, փոխվում է:

Հարցին՝ երկրի ղեկավարն ի պաշտոնե՞ է հրավիրվում, թե՞ անձամբ իրեն է ուղարկվում հրավերը՝ հաշվի առնելով, որ, օրինակ՝ Հայաստանի դեպքում դեկտեմբերի 10-ին տեսականորեն կարող է վարչապետի պաշտոնին այլ անձ լինել, Նավասարդյանը պատասխանեց.

«Եվ որպես պաշտոնակատարի՝ դիվանագիտական խողովակներով է ուղարկվել հրավերը, բայց պատասխանը չկա. շատ բան կախված կլինի նրանից, թե ինչպիսի տեսք կունենա վերջնական ծրագիրը, դրանից կախված կլինի նաև մեր իշխանությունների դիրքորոշումը և որոշումը»: