Հայկական արմատներով գեղեցկուհին Վրաստանը կներկայացնի «Միսս տիեզերք» մրցույթում

Վրաստանը դեկտեմբերի 17-ին Թաիլանդում մեկնարկող «Միսս տիեզերք-2018» միջազգային գեղեցկության մրցույթում կներկայացնի 25-ամյա մոդել Լարա Յանը:

Մոդելը, որը զբաղվում է երաժշտությամբ, ցանկանում է պատշաճ կերպով ներկայացնել Վրաստանը հեղինակավոր գեղեցկության մրցույթում: Լարան նոյեմբերի 29-ին արդեն մեկնել է Թաիլանդ: Նա «Միսս տիեզերք-2018»-ին մասնակցելու իրավունք է ստացել՝ նվաճելով «Վիցե միսս Վրաստան-2017» տիտղոսը: Աղջիկը ծնունդով Վրաստանի Թելավի քաղաքից է, երկար տարիներ ապրել է Ռուսաստանի Չեբոքսարի քաղաքում, ապա կրկին վերադարձել հայրենիք:

«Երեք տարի է՝ բնակվում եմ Թբիլիսիում: Ես հաճախ եմ ճանապարհորդել, սակայն միշտ ձգտել եմ վերադառնալ հայրենիք, որովհետև շատ եմ սիրում Վրաստանը: Մենք երկար տարիներ ապրել ենք Ռուսաստանում: Մայրս վրացի է, հայրս՝ հայ, որը  ծնվել և մեծացել է Վրաստանում»,- պատմել է Լարան:

Մոդելային կարիերան Լարան սկսել է Ռուսաստանում, երբ 17 տարեկան էր: Սկզբում ընտանիքն այն համարում էր հրապուրանք՝ չպատկերացնելով, որ աղջկա զբաղմունքը կարող է վերաճել հաջող կարիերայի:

«Դպրոցը, այդ թվում՝ երաժշտական, ավարտել եմ Ռուսաստանում: Ի դեպ, այս տարի հաճելի զուգադիպություն եղավ: Ռուսաստանում «Միսս Ռուսաստան» տիտղոսը նվաճած մոդելը, որը ևս մասնակցելու է «Միսս տիեզերք-2018» գեղեցկության մրցույթին, և ես նույն գործակալությունից ենք, այնպես որ, ռուսական գործակալությունը միաժամանակ կաջակցի և՛ ինձ, և՛ նրան»,- ասել է Լարա Յանը:

Վրաստանը նման մրցույթին ներկայացնելը Լարայի համար ոչ միայն մեծ պատիվ է, այլև պատասխանատվություն և քրտնաջան աշխատանք: Մի ամբողջ տարի աղջիկը քրտնաջան աշխատել է, որպեսզի արժանապատիվ ներկայացնի Վրաստանը, որը նրան միջազգային մրցույթի ուղեգիր է տվել:

«Ցանկացած աղջկա համար ներկայացնել իր երկիրը նման պատասխանատու մրցույթում, ինչպիսին է«Միսս տիեզերքն» է, պատիվ է և պատասխանատվություն: Այդ պատճառով ես շատ եմ աշխատում, որ չսխալվեմ և ոչինչ չմոռանամ»,- ասում  է Լարան:

Փորձերը, առողջ ապրելակերպը, «բյութի պրոցեդուրաները» Լարիի կյանքի անքակտելի մասն են: Նրա կարծիքով՝ այն իր կյանքի անքակտելի մասն է, որը պահանջում է ամենօրյա քրտնաջան աշխատանք:

«Կարծում եմ՝ պետք է շատ աշխատել և խելացի լինել: Կարևոր է ունենալ նպատակ, լինել ուժեղ, լինել համբերատար , որովհետև իրական կյանքում ամեն ինչ այնքան հեշտ չէ, որքան թվում է հեռվից՝ անցար պոդիումով և վերջ: Դա շատ բարդ է, և պետք է աշխատել ամեն օր»,- համոզված է երիտասարդ մոդելը:

Լարան տիրապետում է վրացերեն, ռուսերեն լեզուներին, սովորում է անգլերեն ու թուրքերեն: Անգամ թողարկել է իր առաջին երաժշտական ալբոմը, որը մոդելը մտադիր է ներկայացնել հանրությանն իր ծննդյան օրը՝ հունվարի 1-ին:

«Նաև վիզաժիստ եմ: Ինչ վերաբերում է երաժշտությանը, ինքս եմ գրում և շուտով կկիսվեմ ունկնդիրներիս հետ»,- ասել է նա: