Եթե պետությունը բնական սահմաններով չի պարփակվում, չի կարող կայուն լինել. Լևոն Շիրինյան

Քուռ-Արաքսյան հանրապետության մասին գաղափարը տեսլական է, նույն կերպ, ինչպես, ասենք, Արցախյան հարցի լուծումը, որը ես դիտում եմ լուծված: Խոսքը գործնականի մասին է: «Շանթ» ՀԸ «Հեռանկար» հաղորդաշարի ընթացքում նման տեսակետ է հայտնել ՀՀ ԱԺ արտահերթ ընտրություններին մասնակցող «Քրիստոնեա-ժողովրդական վերածնունդ» կուսակցության առաջին համարի ներքո հանդես եկող Լևոն Շիրինյանը՝ մեկնաբանելով իրենց ուժի կողմից առաջ բերվող գաղափարը:

«Եթե Դուք 1982 թվականին որևէ հայի ասեիք, որ գիտեք, Ղարաբաղի հարցը կարող է լուծվել, կասեր՝ սա ցնդած է, այս Սովետը, Ղարաբաղն ո՞ւր է, ի՞նչ Ղարաբաղ, այս ինչի՞ մասին է խոսքը: Բայց դա մեր դուռը թակեց այն ժամանակ, երբ Հայաստանի շուրջ միջազգային ուժերի աշխարհաքաղաքական հետաքրքրությունները փոխվեցին և հաշվեկշիռը փոխվեց, և մենք, ստիպված, անկախության պայքարի փոխարեն, սկզբի փուլը հիշում եք, դրանից շուտ սկսեցինք ազգային- ազատագրական կռիվը, որովհետև այլ տարբերակ չունեինք»,- ասել է նա:

Նա մեջբերել է ավստրիացի սոցիոլոգներից մեկի միտքն այն մասին, որ «թուլացող պետությունները պատերազմի հրահրիչներ են, որովհետև հարևաններն ուզում են խժռել»՝ բնորոշելով այդ միտքն որպես իրականությանը համապատասխան:

«Մեր Արտաշես Մեծագործը, որի մասին ես շատ եմ խոսում, երբ Հայկական լեռնաշխարհն ամբողջականացվեց, բացի 4-րդ Հայքից, եկավ, հանգեց այն եզրակացության, որ եթե պետությունը բնական սահմաններով չի պարփակվում, այդ պետությունը կայուն չի կարող լինել, այդ պետությունը զարգացում չի կարող ունենալ, երկար կյանք չի կարող ունենալ»,- ասել է նա:

Արամ Աբրահամյանի այն հարցին, թե ինչ նշաններ կան, որ Ադրբեջանն ու Թուրքիան թուլանում են, Լևոն Շիրինյանը նշել է, որ հարցն ավելի շատ այն է, որ հզորացող Հայաստանը կարող է բաղադրիչ դառնալ և դրա համար նրան տեսլական է պետք:

«Եթե այդ տարբերակն է, ուրեմն պիտի իմանա, որ անպայման պետք է այդ բնագծեր դուրս գա՝ մինչև խառնարան և այսպիսով ստանա ապահովություն, այլ կերպ այս վիճակը շարունակվելու է տասնամյակներ»,- ասել է նա:

Նա հայտնել է, որ իր այս տեսակետը կիսում է նաև ռազմական հայտնի գործիչ Նորատ Տեր-Գրիգորյանցը: