ՔՈ-ն այսօր մանդարիններ ու բուկլետներ է բաժանել Երևանի Ավան վարչական շրջանում

Այսօր Երևանի Ավան վարչական շրջանում քարոզարշավ են իրականացրել «Քաղաքացու որոշում» սոցիալ-դեմոկրատական կուսակցության ռեյտինգային ներկայացուցիչները: Նրանք պարզաբանել են, թե որոնք են լինելու այն առաջնահերթ խնդիրները, որոնք պատրաստվում են լուծել խորհրդարան մտնելու պարագայում.

«Մեր կուսակցության տեսլականը կայանում է համընդհանուր բարեկեցության պետություն ստեղծելու և արդար ու համերաշխ հասարակություն կառուցելու մեջ: Մենք շփվում ենք քաղաքացիների հետ ուղիղ՝ անհատական շփումներով, հանդիպում ենք մարդկանց հետ, խոսում ենք, ներկայացնում ենք, հիմնականում դրական արձագանք է լինում, մարդկանց դեմքին ժպիտ ենք բերում՝ այդ մի բուկլետը, մանդարինը նրանց համար այնքան դրական էմոցիա է առաջացնում, որ վստահ ենք՝ օրվա հետագա ընթացքն ավելի լավ, ուրախ էմոցիաներով է շարունակվում, քան սկսել էր»,- ասել է ՔՈ-ի ռեյտինգային թեկնածու Վլադիմիր Հովհաննիսյանը:

Ըստ ԱԺ պատգամավորության թեկնածուի՝ միևնույն ժամանակ առաջնորդվում են այն սկզբունքով, որ ընտրողին պետք չէ հոգնեցնել, պետք է ասել այնքան, որքան որ նրան իրապես հետաքրքրում է: Մարդիկ այսօր սոցիալական, կենցաղային խնդիրներ ունեն, ՔՈ-ի նպատակը նրանց մի պահ այդ ամենից կտրելն է:

«Խոսում ենք մեր մասին, ներկայացնում ենք, բայց վերջում որոշումը, ինչպես մեր կուսակցության անունն է հուշում, քաղաքացունն է»,- հավելել է Հովհաննիսյանը:

Իսկ մյուս ռեյտինգային թեկնածուն՝ Հովհաննես Կարապետյանն ավելի մանրամասնորեն է ներկայացրել իրենց նախընտրական ծրագրի հիմնական դրույթները։

«Կուսակցության առաջնահերթություններից է կրթության և առողջապահության համահավասար իրավունքից օգտվելու հնարավորությունը: Մարդը, եթե չունի ֆինանսական հնարավորություններ, դա չպետք է խանգարի, որպեսզի  օգտվի թե կրթություն ստանալու իրավունքից, թե իր առողջությունը վերականգնելու, բուժվելու իրավունքից: Դա վերաբերում է բոլոր տարիքային խավերին: Շատ հաճախ մենք Հայաստանում տեսնում ենք, որ մեծահասակ մարդիկ երբեմն չեն կարողանում վերապրոֆիլավորվել, որպեսզի կարողանան նոր աշխատանք գտնել, կամ աշխատանքի առաջընթաց ունենան»,- ասել է  Հովհաննիսյանը: