Հայաստանը գրավել է «Համաշխարհային առաջնորդության հիմնադրամ»-ի պատվիրակությանը

Նախագահ Արմեն Սարգսյանի հրավերով մայիսի 11-ին Հայաստան է ժամանել «Համաշխարհային առաջնորդության հիմնադրամ»-ի պատվիրակությունը, որի կազմում են 1989-92 թթ. ՄԱԿ-ում Միացյալ Նահանգների մշտական ներկայացուցիչ Թոմաս Փիքերինգը, Շվեյցարիայի նախկին նախագահ Միշելին Կալմի-Ռեյը, 2011-17 թթ. ՄԱԿ-ի գլխավոր քարտուղարի՝ խաղաղապահ առաքելությունների հարցով տեղակալ Հերվե Լադսուսը: Այցի շրջանակում պատվիրակության անդամները հանդիպել են Հանրապետության բարձրագույն ղեկավարության հետ, այցելել են Մայր Աթոռ Սուրբ Էջմիածին, նաև եղել Հայոց ցեղասպանության հուշահամալիրում:

«Մեզ համար մեծ պատիվ է լինել այստեղ: Երկրի նախագահի նախաձեռնությամբ մենք խոսել ենք Հայաստանի տարբեր շրջանների ներկայացուցիչների, ինչպես նաև տարբեր ոլորտների ղեկավարների, քաղաքական գործիչների հետ, որպեսզի հստակ պատկերացում կազմեինք Հայաստանի մասին: Հենց դա է մեր` այստեղ գալու նպատակը: Մենք այստեղ ենք, որպեսզի կարողանանք օժանդակել, ինչով հնարավոր է: Մենք կարող ենք օգնել միայն փոքր հարցերում, գուցե, նոր գաղափարներ տանք կամ օգնենք վերաբացահայտել հին գաղափարները»,- լրագրողների հետ հանդիպման ժամանակ իր տպավորություններով կիսվել է Թոմաս Փիքերինգը:

Ի դեպ «Համաշխարհային առաջնորդության հիմնադրամ»-ը շահույթ չհետապնդող, անկախ կառույց է, որն աջակցում է քաղաքական առաջնորդներին՝ նրանց համար հասանելի դարձնելով նախկին ղեկավարների փորձառությունը: Այն հիմնադրվել է 2004 թվականին և հիմնադրումից ի վեր խորհրդատվություն է մատուցել այնպիսի ոլորտներում, ինչպիսիք են տարածաշրջանային անվտանգությունը, անվտանգության ոլորտի արդիականացումը, ահաբեկչական կազմակերպություններին դիմակայումը և գերիների ազատ արձակումը, քաղաքական հաշտեցումն ու միջազգային համաձայնագրերի կիրառումը, ընտրություններն ու տնտեսական բարեփոխումները, առևտուրն ու ռեսուրսների կառավարումը, ժողովրդավարական ինստիտուտների զարգացումը, հումանիտար օգնության հասանելիությունը, հակամարտությունների կառավարումը և այլն:

«Համաշխարհային առաջնորդության հիմնադրամ»-ի բոլոր անդամները պետությունների կամ կառավարությունների նախկին ղեկավարներ, բարձրաստիճան պաշտոններ զբաղեցրած անձինք են: Հայաստանի Հանրապետության նախագահը 2006-2013 թվականներին ևս եղել է հիմնադրամի խորհրդի անդամ:

Կազմակերպության գործող անդամների շարքում են ՆԱՏՕ-ի նախկին գլխավոր քարտուղար Խավիեր Սոլանան, Ֆրանսիայի նախկին վարչապետ Ժան-Պիեր Ռաֆարենը, Առևտրի համաշխարհային կազմակերպության նախկին գլխավոր տնօրեն Մայք Մուրը, Շվեդիայի նախկին վարչապետ և արտգործնախարար Կարլ Բիլդտը, ՄԱԿ-ի գլխավոր քարտուղարի նախկին առաջին տեղակալ Լուիզա Ֆրեշետը, Գանայի նախկին նախագահ Ջոն Կուֆուորը, ՄԱԿ-ում ԱՄՆ նախկին մշտական ներկայացուցիչ Դոնալդ ՄըքՀենրին, Իսպանիայի նախկին արտգործնախարար Անա Պալասիոն, Ավստրալիայի նախկին վարչապետ Քևին Ռադը, Լատվիայի նախկին նախագահ Վայրա Վիկե-Ֆրեյբերգը և այլք: