Եթե բնակիչները չհամաձայնեն, իրենց շենքի վերելակը չի փոխվի. փոխքաղաքապետ

Երևանի փոխքաղաքապետ Հայկ Սարգսյանն այսօր ասուլիս է հրավիրել: SHANTNEWS.am-ի հարցին ի պատասխան` խոսել է այն մասին, թե ինչ քայլեր են ձեռնարկվում Երևանի բազմահարկ շենքերում հնամաշ վերելակները փոխելու ուղղությամբ: Սարգսյանի խոսքերով` մշակվում է ծրագիր, որը շուտով կներկայացվի կառավարությանը: Լրագրողներ – փոխքաղաքապետ բուռն քննարկումը սկսվել է այն ժամանակ, երբ Սարգսյանն ասել է, որ նոր վերելակներ ունենալու համար քաղաքացիներն են վճարելու, և այն 20-30 տոկոսով ավելի է լինելու այսօրվա վճարից:

Լրագրողների այն պնդմանը, թե քաղաքացին արդեն իսկ վճարում է՝ որակյալ ծառայություն ստանալու համար, բայց չի ստանում, փոխքաղաքապետն արձագանքել է.

«Հարգելինե՛րս, մենք էստեղ ծառայության որակ չենք ավելացնում, սա կապիտալ ներդրում է, սա նոր գույքի ձեռքբերում է: Դա մի բան է, ծառայության որակի բարելավումը` մեկ այլ: Ծառայությունը վերելակի սպասարկումն է, վերելակի փոխարինումը ծառայություն չի: Վերելակի փոխարինումը նոր գույքի վա կապիտալ ներդրում է: Դա նախասկզբնական բեռ է, և այդ բեռը քաղաքապետարանը փորձում է բաշխել ժամանակի մեջ, որպեսզի նվազագույնը լինի»,- ասել է փոխքաղաքապետը` հավելելով, որ գիտակցում են, որ վերելակի վճարի 30 տոկոս ավելացումը ֆինանսական բեռ կարող է լինել քաղաքացիների համար, բայց մյուս կողմից էլ պետք է հասկանալ, որ այն գումարը, որը հիմա է վճարվում, բավարար չէ ապահով վերելակներ ձեռք բերելու համար:

Հիշեցնենք, որ խոսքը մոտ 3000 վերելակ փոխելու մասին է, իսկ հաշվարկներն ասում են, որ դրա համար ավելի քան 30 մլրդ է անհրաժեշտ:

«Մեկ տարվա համար Երևանի բնակիչները բյուջե են վճարում 30 մլրդ: 33 միլիարդանոց նոր ծախսի իրականացումը, պարզ է, որ հնարավոր չէ 30 մլրդ-ի պարագայում կատարել: Սա անվերապահորեն և շատ տրամաբանորեն ենթադրում է որոշակի ներդրում քաղաքացիների կողմից: Սա որևէ պարտադրանքի բնույթ չի կրելու: Վերելակը բնակիչների բաժնային սեփականության օբյեկտ է, բնակիչներն են որոշելու` վերելակը դնե՞լ փոխարինման, թե՞ ոչ: Կլինեն բնակիչներ, ովքեր դրան դեմ կլինեն, որը կհանգեցնի վերելակը չփոխելուն, կամ այլ լուծում կգտնվի՝ վերանորոգում, և այն», – ասել է փոխքաղաքապետը՝ հավելելով, որ քաղաքապետարանը որևէ շենքում առանց բնակիչների համաձայնության վերելակների փոխարինում չի իրականացնելու:

Հայկ Սարգսյանը նաև ասել է, որ քաղաքապետարանի աշխատակիցները շրջել են շենքերում, հարցումներ կատարել: Բնակիչներն ասել է, որ դեմ չեն:

Երևանի փոխքաղաքապետը նաև նշել է, որ փոփոխության համար անհրաժեշտ է շենքի բնակիչների 100 տոկոսի համաձայնությունը: