80 հազար դրամ վճարի վերաբերյալ հարցը 80 րոպե քննարկվեց ԱԺ հանձնաժողովում և չլուծվեց

«Զինծառայողների ապահովագրության հիմնադրամը» իր հաշվետվությունները պարտավոր է իր հաշվետվությունները ներկայացնել Azdarar.am կայքում և դրա համար վճարել 80 հազար դրամ։ ԱԺ ԲՀԿ պատգամավոր Տիգրան Ուրիխանյանը, որ նաև որպես ԱԺ ամենամեծ ընդդիմադիր խմբակցության ներկայացուցիչն է հիմնադրամի հոգաբարձուների խորհրդում, ներկայացրել է նախագիծ, որով այս հիմնադրամը բացառություն է լինելու և այդ գումարը չի վճարելու։

ԱԺ պետաիրավական հարցերի հանձնաժողովի նիստում այդ առաջարկը ներկայացնելիս Ուրիխանյանն ասաց, որ խնդիրը գումարի չափը չէ, այլ բարոյական կողմը, քանի որ հիմնադրամը իր հավաքած բոլոր գումարները՝ մինչև վերջին լուման, ուղղում է զոհված ու հաշմված զինծառայողների ընտանիքներին օգնություն տրամադրելուն, նույնիսկ դրա աշխատակազմը որևէ առանձին հատուցում չի ստանում աշխատանքի դիմաց։

Իշխանական պատգամավորներից մի քանիսը, սակայն, որոշակի անհամաձայնություն ցուցաբերեցին՝ պնդելով, որ գումարը մեծ չէ, իսկ եթե այս բացառությունը արվի, ինչո՞ւ պետք է մյուս հիմնադրամների դեպքում նման բացառություն չարվի, ինչո՞ւ աշխատակազմը աշխատավարձ չի ստանում և այլն։

ԼՀԿ պատգամավորը կոնսենսուսային փոփոխություն առաջարկեց՝ բացառություն անել ոչ միայն այս հիմնադրամի, այլ մյուս բոլոր այն հիմնադրամների համար, որոնք ստեղծվել են օրենքով ու պետության կողմից՝ հանրային որևէ կարևոր ոլորտում լուծում տալու համար։ Բայց այս տարբերակը քննարկելու համար էլ պատգամավորները խնդրեցին ժամանակ տրամադրել՝ դրա հետևանքները հասկանալու համար։

80 հազար դրամի հարցի քննարկումը տևեց ավելի քան 40 րոպե, չլուծվեց, ու դեռ 30 րոպե ժամանակ հատկացվեց հավելյալ քննարկման համար։

Ընդմիջումից հետո, թեև հանձնաժողովի նախագահը նշեց, որ սկզբունքային համաձայնություն կա, բայց հարցը ևս մոտ 10 րոպե քննարկվեց։ Քվեարկության 4 կողմ, 4 դեմ, 3 ձեռնպահ ձայներով օրինագիծը հավանություն չստացավ, ու չի ներկայացվի ԱԺ լիագումար նիստերին։