ՈւԵՖԱ-ն թույլ չի տա Սուպերլիգայի խաղացողներին հանդես գալ աշխարհի և Եվրոպայի առաջնություններում 

Եվրոպական ֆուտբոլային ասոցիացիաների միությունը (ՈՒԵՖԱ) թույլ չի տա Սուպեր լիգայի մասնակից ակումբների խաղացողներին խաղալ ազգային հավաքականներում Եվրոպայի և աշխարհի առաջնություններում: Այս մասին Sky Sport Italia հեռուստաալիքի եթերում հայտարարել է ՈւԵՖԱ-ի նախագահ Ալեքսանդր Չեֆերինը, այս մասին գրում է ՏԱՍՍ-ը:

Երեկ գիշեր եվրոպական 12 առաջատար ակումբներ հայտարարեցին Սուպերլիգայի ստեղծման մասին: ՈւԵՖԱ-ն, Անգլիայի, Իսպանիայի և Իտալիայի ֆուտբոլի ազգային ֆեդերացիաների ղեկավարությունը, ինչպես նաև այդ երկրների առաջնությունները դատապարտեցին ակումբների որոշումը և հայտարարեցին, որ այդ թիմերը նույնպես դուրս կգրվեն ազգային մրցաշարերի մասնակիցների ցուցակից: Սուպերլիգայի հիմնադիր ակումբներն են անգլիական «Մանչեսթեր Յունայթեդը», «Մանչեսթեր Սիթին», «Տոտենհեմը», «Լիվերպուլը», «Չելսին» և «Արսենալը», իսպանական «Բարսելոնան», «Ատլետիկոն» և «Ռեալը», իտալական «Միլանը», «Ինտերը» և «Յուվենտուսը»:

«Այն ֆուտբոլիստները, ովքեր կմասնակցեն Սուպերլիգային, չեն խաղա աշխարհի և Եվրոպայի առաջնություններին»,- հայտարարել է Չեֆերինը,- «Ֆուտբոլի աշխարհը միավորված է, կառավարությունները միավորված են, բոլորը միավորված են այս անիմաստ նախագծի դեմ»: 

«Հիմնական սկզբունքը չի կարող փոխվել, համերաշխությունը հավերժ բան է: Բայց որոշ մարդկանց համար համերաշխություն գոյություն չունի, միակ բանը, որ գոյություն ունի, դա փող է նրանց գրպանում»,- ավելացրել է ՈւԵՖԱ-ի նախագահը:

Պլանավորվում է, որ Սուպերլիգային կմասնակցեն 15 հիմնադիր ակումբներ, ինչպես նաև հինգ այլ թիմեր, որոնք սեզոնից սեզոն կփոխվեն: Խաղերը տեղի կունենան շաբաթվա կեսին, ակումբները կշարունակեն խաղալ իրենց ազգային առաջնություններում, իսկ մրցաշրջանը կսկսվի օգոստոսին:

Հիմնադիր ակումբները կստանան մոտավորապես 3․5 միլիարդ եվրո՝ իրենց ենթակառուցվածքների ներդրման ծրագրերին աջակցելու և կորոնավիրուսային համաճարակի ազդեցությունը վերացնելու համար: Սուպերլիգան ակնկալում է, որ ակումբային վճարները զգալիորեն կգերազանցեն ընթացիկ եվրոպական մրցույթից ստացված եկամուտը և կկազմեն ավելի քան 10 մլրդ եվրո: