Տարոն Մարգարյանի հրաժարականով հարցը վերջնական լուծում չի ստանում. Մարինա Խաչատրյան

Երևանի ավագանու «Երկիր ծիրանի» խմբակցության անդամ Մարինա Խաչատրյանն Ավագանու հուլիսի 12-ի արտահերթ նիստի ժամանակ հանդես եկավ ելույթով, որում անդրադարձավ քաղաքային իշխանությունների գործունեությանը: Նա նշեց՝ ժամանակին անընդհատ բարձրաձայնվող գարշահոտի մեղավորը, պարզվեց, միրգ-բանջարեղենը չեն, այլ քաղաքային իշխանության անգործությունը:

«Քաղաքային բյուջեից 16 մլն դոլար է դուրս գրվել, սակայն քաղաքը մինչ օրս կորած է աղբի ու կոյուղաջրերի մեջ,  շուրջ 3,5 մլն դոլար դուրս է գրվել քաղաքի կանաչապատման համար, սակայն իրականում այսօր կատարվում է ծառերի սպանդ: Տրանսպորտի հիմնահարցի լուծման համար արդեն ծախսել է շուրջ 1 մլն դոլար՝ տալով այն խորհրդատվական կազմակերպությանը, մարդ կա՞ այսօր, ով կարող է գոհ լինել քաղաքային տրանսպորտի աշխատանքից»,- ասաց նա:

Խաչատրյանի գնահատմամբ՝ Երևան քաղաքը քանդել են նաև քաղաքացիների անտարբերության ու թողտվության պատճառով, քաղաքը վերածվել է մոխրագույն քարակույտի: Ավագանու անդամի խոսքով՝ մի երկրում, որտեղ, ըստ պաշտոնական տվյալների, այսօր ապրում է 1 մլն աղքատ քաղաքացի, ում հրապարակայնորեն առաջարկում են ուտել կարտոֆիլ, ոչ ոք իրավունք չունի հանրային միջոցները թալանելու:

«Եթե այսօր մեր 18 տարեկան երեխաները պարզ ճակատով և անվախ սրտով կանգնում են թշնամու առաջ և պաշտպանում են մեր հայրենիքը, ապա ի՞նչ է եղել մեզ, որ չկանգնենք ու չվերացնենք մեր քաղաքը քանդող հանցագործ բանդան: Տարոն Մարգարյանի հրաժարականով հարցը վերջնական լուծում չի ստանում, նա հանցագործ համակարգի կողմից գնված գործիք էր՝ հասարակ մի գող. հին ժամանակներում այդպիսի գողերի ձեռքերն էին կտրում, բայց մենք դեմ ենք, մերժում ենք ցանկացած կտտանք, պահանջում ենք, որ նրա գործողությունները ստանան քրեաիրավական գնահատական»,- ասաց նա:

Խաչատրյանն ընդգծեց՝ պետք է թույլ չտալ, որ մեկ գործիքը փոխարինվի մեկ այլ գործիքով: