Վրաստանի նախագահի ընտրությունը բախումներ է առաջացրել ջավախահայերի միջև

Վրաստանում նախագահական ընտրապայքարը վերջին երկու շաբաթվա ընթացքում լարվածություն է առաջացրել Ջավախքում: Հոկտեմբերի 30-ին ծեծի էր ենթարկվել ընդդիմության ներկայացուցիչ Աշոտ Ռաիսյանը, իսկ նոյեմբերի 7-ին՝ մեկ այլ ընդդիմադիր` Ռեմիկ Պողոսյանը: Երկու դեպքում էլ ընդդիմությունը մեղադրում է Ջավախքից վրացական խորհրդարանի պատգամավոր ընտրված Հենզել Մկոյանին:

Բանն այն է, որ հոկտեմբերի 29-ին Վրաստանում նախագահի ընտրության առաջին փուլում ամենաշատ ձայներ հավաքեցին իշխանության թեկնածու Սալոմե Զուրաբիշվիլին և ընդդիմադիր «Միացյալ ազգային շարժում» կուսակցության ներկայացուցիչ Գրիգոլ Վաշաձեն: Նշանակվեց երկրորդ փուլ:

Արդեն հոկտեմբերի 30-ին վրացական մամուլը հրապարակեց տեղեկություններ Ջավախքում քաղաքական հաշվեհարդարների և ընդդիմության նկատմամբ ճնշումների մասին: Այդ օրը ծեծի էր ենթարկվել Ախալքալաքում միավորված ընդդիմության պատասխանատու Աշոտ Ռաիսյանը: Վերջինս դրա համար մեղադրում է իշխող «Վրացական երազանք» կուսակցության անդամ, Վրաստանի խորհրդարանի պատգամավոր Հենզել Մկոյանին:

SHANTNEWS.am-ը որոշեց լսել երկու կողմին էլ:

Հեռախոսազրույցում Հենզել Մկոյանն ասաց, որ Ջավախք այցելության ժամանակ նախագահի թեկնածու Սալոմե Զուրաբիշվիլիին հայհոյել է Աշոտ Ռաիսյանը, ու թեև ջավախքցի երիտասարդները ցանկացել են ծեծել նրան, սակայն հենց ինքը՝ Մկոյանն է արգելել դա անել, սակայն ընտրությունից 1-2 օր առաջ Ռաիսյանը կրկին դիմել է սադրանքների, պատռել Սալոմե Զուրաբիշվիլիի նախընտրական պաստառները, ինչից հետո արդեն ենթարկվել է ծեծի, որի հետ ինքը որևէ կապ չունի:

Աշոտ Ռաիսյանը խոսակցության ժամանակ հայտնեց, թե ինքը հայհոյել է ոչ թե Սալոմե Զուրաբիշվիլիին, այլ նրա հետ Ջավախք ժամանած երիտասարդներին, որոնք իր նկատմամբ անհարգալից վերաբերմունք են ցուցաբերել:

Ինչո՞ւ է տեղի ունեցել ծեծը և ո՞վ է հեղինակը: Աշոտ Ռաիսյանը համոզված է, որ հրահանգը տվել է անձամբ պատգամավոր Հենզել Մկոյանը, վերջինս հակադարձում է՝ հենց ինքն է տուժել, քանի որ ընդդիմության ներկայացուցիչը Ջավախքում արատավորում է իր և նախագահի թեկնածու Սալոմե Զուրաբիշվիլիի հեղինակությունը: Որպես ապացույց՝ Հենզել Մկոյանը մեզ ուղարկեց տեսանյութ, որտեղ Աշոտ Ռաիսյանն ու նրա ընկերները ապօրինություններ ու ագրեսիվ քայլեր են անում «Վրացական երազանք» կուսակցության գրասենյակի նկատմամբ:

Նոյեմբերի 7-ին էլ մեկ այլ միջադեպ է տեղի ունեցել Ջավախքում, որից տուժողը եղել է Ռեմիկ Պողոսյանը: Հիվանդանոցում, սակայն, նա ոստիկանությանը հակասական տեղեկություններ է տվել, թեև ընդդիմադիր ուժերն ասում են, որ կրկին Հենզել Մկոյանն է հարձակում կազմակերպել: Հենզել Մկոյանն այս հայտարարությունը ևս հերքեց՝ ասելով, թե երբևէ չի ճանաչել Ռեմիկ Պողոսյանին, նույնիսկ այդ մարդը չի ուզում մեղադրել Մկոյանին, սակայն Աշոտ Ռաիսյանը շարունակում է պնդել, որ ջավախահայերը ենթարկվում են ճնշումների և վախենում են հրապարակավ խոսել Հենզել Մկոյանի անօրինությունների մասին:

Երկու դեպքի առիթով էլ Վրաստանում հարուցվել են քրեական գործեր, հայտարարություններ են արել ընդդիմադիր և իշխանության կառույցները: Ընդդիմության միասնական թեկնածու Գրիգոլ Վաշաձեն ասել է, որ Ջավախքում տեղի ունեցող գործողություններն ապացուցում են, որ իշխանությունը փորձում է ամեն կերպ ճնշել իրենց, իշխող կուսակցությունը հակառակ կարծիքին է՝ նախկին նախագահ Միխայիլ Սաակաշվիլիի քաղաքական կուրսը կրող ընդդիմադիր գործիչները դիմում են սադրանքների, բախումներ են հրահրում, որպեսզի իշխանության թեկնածուի նկատմամբ հակակրանք առաջացնեն:

Վրաստանում նախագահի ընտրությունը տեղի կունենա մինչև դեկտեմբերի 2-ը, իսկ Ջավախքում փոխադարձ մեղադրանքներն ու սպառնալիքները շարունակվում են, թեև բարիկադների երկու կողմում էլ հայեր են: