Ինչպես չխաբվել տոմս կամ ուղեգիր գնելիս. ամառը սարերի հետևում չէ

Ամառն ուր որ է՝ կհասնի, իսկ լրահոսը նախազգուշացնող է: Օրերս ձերբակալվեց զբոսաշրջային մի ընկերության աշխատակից. Նա ամրագրումներ էր արել Հայաստանի ու արտերկրի հյուրանոցներում, իբր կազմակերպել նրանց հանգիստը, իսկ իրականում հափշտակել էր խոշոր չափի գումար: Իրավիճակն ավելի մտահոգիչ է դառնում, երբ միջազգային վիճակագրությունն ես թերթում. միայն նախորդ տարի աշխարհում 5000 զբոսաշրջիկ է տուժել խաբեբաներից։

Ինչպես անել, որ չլինես նրանցից մեկը

Լիանա Խաչատրյանը տարիներ առաջ որոշել էր  հանգիստն անցկացնել Եգիպտոսում: Ձեռք էր բերել ուղեգիր ամբողջ ընտանիքի համար: Թռիչքից առաջ տարբեր մարդկանցից լսել են, որ իրենց տոմսերով նախատեսված չվերթ չկա.

«Մեկնելուց 2 շաբաթ առաջ իմանացանք, որ չենք մեկնելու, դատական գործընթաց սկսվեց, մարդիկ հետ էին պահանջում իրենց գումարը: Հետ ստացանք գումարի մի փոքր մասը միայն»։

Ինչ կարող է անել պետությունը

Տնտեսական զարգացման և ներդրումների նախարարությունից SHANTNEWS.am-ին պատմեցին, թե Զբոսաշրջության պետական կոմիտեն ինչ կարող է անել նման դեպքերում.

«Այդ խնդիրներն իրավապահ մարմինների կարգավորման դաշտում են, բայց հաշվի առնելով վերջին դեպքերը, կոմիտեն նպատակ ունի բարձրացնել քաղաքացիների իրազեկվածությունը նման վտանգների վերաբերյալ»,-ասում է մամուլի խոսնակը:

Ինչպես չխաբվել․ սոցիալական հոլովակներ, տեղեկատվական թերթիկներ: Ըստ այդմ, մի՛ գայթակղվեք ցածր գնով, հեռո՛ւ փախեք, եթե հանգստի առաջարկն անողը չունի գրասենյակ, իրավական փաստաթղթեր, իսկ ցանկությունը մեծ է հաճախորդներին հանդիպել նրանց հարմար ցանկացած վայրում ու ցանկացած ժամի:

Եվ այսքանը`պետական միջամտությունը մեր հանգստին ավարտվում է։

Բարեխի՞ղճ թե՞ խաբեբա

Իրենք`տուրօպերատորներն, ամենաանհանգիստն են այս օրերին: Հերիք չեն թանկ ավիատոմսերն ու ուղեգրերը, հիմա էլ՝ խաբեբաները: Երևանյան առաջատար տուրիստական ընկերություններից մեկի մենեջեր Ռոզա Գրիգորյանն ասում է.

«Քանի որ շուկայում շատացել են այն տուրիստականները, որոնք աշխատում են քանակի վրա, շուկայում դեմպինգ է գնում: Մեր քաղաքացիների մոտ սովորություն կա, եթե իրենք տեսնում են լավ գին, թեկուզ այն տուրիստականը, որի հետ 10 տարի աշխատել են, կարող են 10 դոլարի համար գնալ ուրիշ տեղ: Կարևորն էժանը չէ, այլ որակը:

Այսպիսով՝ եթե ուզում ես չխաբվել, պետք է ընտրել վստահելիներին, ոլորտի երկարակյացներին ու դա անել միայն շուկայի իրական գներն իմանալուց հետո:

Էժան պանիրը՝ միայն թակարդում

Սա աշխատող հուշում է, եթե հատկապես էժան ուղեգիր կամ տոմս են առաջարկում Երևանից չվերթով: էժան թռիչքը «Զվարթնոցից» դեռևս երազանք է հայաստանցիների համար: Թբիլիսիի օդանավակայանում գոնե մի քանի անգամ հաստատ եղել է իրեն հարգող ամեն հայ զբոսաշրջիկ. Վրաստանով հանգստի մեկնելն ավելի էժան է: