Ո՞ր երկրներից են գալիս Հայաստան՝ աշխատանք փնտրելու

2019թ-ի առաջին կիսամյակում, համաձայն ՀՀ ԿԱ պետական եկամուտների կոմիտեի կողմից ներկայացված եկամտային հարկի ամսական հաշվարկների, ՀՀ-ում աշխատող օտարերկրացիների թիվը կազմել է 4,990 անձ կամ ՀՀ աշխատաշուկայում «զբաղվածների» ընդհանուր թվի (964.2 հազար մարդ) 0.5%-ը։ Ինչպես հայտնում է SHANTNEWS.am-ը, օտարերկրացի աշխատուժի մեծամասնությունը՝ 3,031 անձ կամ ընդհանուր թվի 60.7%-ը, եղել են տղամարդիկ։

ՀՀ աշխատաշուկայում ներկայացված օտարերկրացի աշխատուժի թվում մեծամասնություն են կազմում 25-34 տարեկանները՝ ընդհանուր թվի 37.6%, որոնց հաջորդում են 35-44 տարեկանները՝ 25.3%, և 45-54 տարեկանները՝ 14.2%: Բավականին մեծ ներկայացվածություն ունի նաև աշխատաշուկա նոր մտնող 16-24 տարեկանների խումբը՝ 12.4%:

2019թ-ի առաջին կիսամյակին ՀՀ-ում աշխատանքային գործունեություն է իրականացրել 73 պետության քաղաքացի։ Նրանց թվում մեծամասնություն` ընդհանուր թվի 63%-ը, են կազմում Եվրասիական տնտեսական միության անդամ պետությունների քաղաքացիները` այդ թվում` ՌԴ քաղաքացիների մասնաբաժինը կազմում է 61%, Ղազախստանի քաղաքացիներինը՝ 1.3%, Բելառուսինը՝ 0.6%, Ղրղզստանինը՝ 0.1%:

ՀՀ աշխատաշուկայում զբաղված օտարերկրացիների ընդհանուր թվում ներկայացված թե՛ ԵԱՏՄ անդամ պետությունների և թե՛ երրորդ պետությունների մասնաբաժինները ՌԴ ցուցանիշի համեմատ շատ համեստ են. հարևան Իրանի և Վրաստանի քաղաքացիների մասնաբաժինը կազմում է համապատասխանաբար 8% և 7.9%, որոնց հաջորդում են Ուկրաինայի քաղաքացիները՝ 6%:

Ընդհանուր առմամբ նախկին ԽՍՀՄ հանրապետությունների քաղաքացիների մասնաբաժինը կազմում է 77.9%` առանց ՌԴ ցուցանիշի՝ 16.9%: Եվրոպական միության անդամ պետությունների (28 անդամ պետություններից 21-ի քաղաքացիները ներկայացված են ՀՀ աշխատաշուկայում) քաղաքացիների թիվը կազմում է 182 անձ կամ ընդհանուր թվի 3.6%։ ԵՄ անդամ պետություններից ՀՀ աշխատաշուկայում զբաված քաղաքացիների թվով առաջատարներն են Իսպանիան (37 անձ կամ ընդհանուր թվի 0.74%), Գերմանիան (29 անձ կամ ընդհանուր թվի 0.58%), Ֆրանսիան (27 անձ կամ ընդհանուր թվի 0.54%) և Միացյալ թագավորությունը (24 անձ կամ ընդհանուր թվի 0.48%)։Հայաստանի Հանրապետությունում աշխատանքային գործունեություն իրականացնող օտարերկրացիները ներգրավված են եղել տնտեսության գրեթե բոլոր 21 ճյուղերում:

Օտարերկրյա աշխատուժի մասնակությունը բացակայում է միայն «Տնային տնտեսությունների գործունեություն որպես գործատու. տնային տնտեսություններում չտարբերակված ապրանքների և ծառայությունների արտադրություն սեփական սպառման համար» ոլորտում։ Ընդհանուր առմամբ, դիտարկվող ժամանակահատվածում, ՀՀ տնտեսության 20 ճյուղերում զբաղված է եղել 5,326 օտարերկրացի. այսինքն՝ եղել են անձինք, որոնք ընթացքում ունեցել են 2 կամ ավելի գործատուներ կամ փոխել են իրենց գործատուին։