Խարիզմատիկ ու տարբերվող. հաջողության ճանապարհ

Երևի Ձեր շրջապատում էլ կան մարդիկ, որոնց խարիզմատիկ եք համարում: Բոլորը նրանց սիրում են, և նրանք միշտ բոլորի մոտ հաջողակ մարդու տպավորություն են թողնում: Հոգեբանները բազմիցս նշել են, որ յուրաքանչյուր ոք էլ կարող է շրջապատում առանձնանալ յուրահատուկ մարդկային որակներով և գործընկերների ու ընկերների կողմից համարվել խարիզմատիկ անձնավորություն: Այսինքն՝ խարիզման ի վերուստ տրված հատկանիշ չէ, այն կարող է ունենալ ձեզնից յուրաքանչյուրը:

ShantNews.am-ը ներկայացնում է  հոգեբանների կարծիքը.

Ինչո՞ւ է պետք խարիզման

Խարիզմատիկ մարդկանց համար շրջապատում ուշադրության կենտրոնում լինելը սովորական բան է: Նրանց ներկայությունը դրական է ազդում մյուսների վրա, և բոլորը ցանկանում են շփվել, խոսել, օգնել, գաղտնիքներ վստահել ու նույնիսկ նմանակել:

«Խարիզմա: Ինչպե՞ս ազդել, համոզել և ոգեշնչել» գրքի հեղինակ Օլիվիա Ֆոքս Քոբեյնը նշում է, որ չնայած տարածված կարծիքներին, այնուամենայնիվ, մարդիկ խարիզմատիկ չեն ծնվում, և գործնականում յուրաքանչյուր մարդ կարող է ջանք ու եռանդ գործադրել և հստակ մոտիվացիա ունենալու պայմաններում դառնալ խարիզմատիկ անհատականություն:

Խարիզմայի արտաքին դրսևորումները

Եթե դու որոշել ես զարգացնել քո խարիզման, ապա առաջին հերթին պետք է մտածես, թե ինչն են քո մոտ առաջինը նկատում և հավանում մարդիկ: Խարիզմատիկ մարդու իմիջը անպայման չէ, որ լինի շքեղ, գրավիչ և վառ, կարող եք լինել հասարակ և հիշվող: Մտածի՛ր մի դետալ, որը կարող է արտահայտել քո էությունը և տպավորել մարդկանց: Ու հենց այդ դետալը դարձրո՛ւ քո այցեքարտը:

Օրինակ՝ Սթիվ Ջոբսը համարյա միշտ կրում էր սև սվիտեր և կապույտ ջինսե տաբատ: Հենց այդ սովորական հագուտն էր նրա այցեքարտը:

Հագուստից ու դետալներից բացի, մյուս կարևոր ասպեկտը, որին պետք է ուշադրություն դարձնել ժեստերի լեզուն է: Ժեստերն ու շարժուձևը միանգամից գրավում են շրջապատի ուշադրությունը: Այսինքն՝ քայլելը, տարածքում տեղաշարժվելը, թեկուզ նստելն ու կանգնելը կարող են ավելի շատ բան ասել Ձեր մասին, քան Ձեր խոսքը:

Փորձեք կառավարել Ձեր ժեստերը, անհրաժեշտության դեպքում կիրառեք նաև ուրիշների օրինակելի ժեստերը:

Խարիզմատիկ մարդկանց սովորությունները

Խարիզմատիկ լինելու համար արտաքինը փոխելուց բացի պետք է փոխեք նաև Ձեր ապրելակերպը` հրաժարվեք հին ու վատ սովորություններից, որոնք Ձեզ խոչընդոտել են այս կամ այն հարցերում: Հոգեբան Ֆոքս Քոբեյնն ընդգծում է, որ խարիզմատիկ մարդկանց պահվածքում գերակշռում են այս երեք տարրերը` ներկայության մատնանշում, ջերմություն և ներքին ուժ:

Ներկա լինել նշանակում է ամբողջությամբ հասկանալ, թե ինչ է կատարվում Ձեր շրջապատում, աշխատավայրում և ամբողջությամբ նվիրվել ինչ-որ մի գործի կամ առաքելության, ուշադրություն դարձնել ամեն դետալին և անհրաժեշտության դեպքում արձագանքել:

Ներքին ուժն ու ջերմությունը շատ դժվարությամբ է հնարավոր համադրել և շրջապատին «հրամցնել», բայց հենց խարիզմատիկ մարդկանց մոտ դա ստացվում է, ու հենց դա է պատճառը, որ շրջապատում հենց նրանց են վստահում: Պետք է մտածեք և գտնեք, թե որն է Ձեր ներքին ուժը:

Խարիզմատիկ ու հաջողակ դառնալու համար պետք է դրական տրամադրվել շրջապատի հանդեպ, պայքարել ու հաղթահարել չարդարացված բարդույթները և պետք է հարգեք ինքներդ Ձեզ ու շրջապատի մարդկանց: Հենց այստեղից է սկսվում է Ձեր խարիզմայի զարգացման և ամրապնդման ճանապարհը: