Լայն տարածում են գտել համացանցի միջոցով կատարվող թմրամիջոցների ապօրինի շրջանառության դեպքերը. քննարկում խորհրդարանում

ԱԺ պաշտպանության և անվտանգության հարցերի մշտական հանձնաժողովում այսօր քննարկվել է «Թմրամիջոցների, հոգեներգործող նյութերի և բաղադրիչների ապօրինի շրջանառության դեմ պայքարում Անկախ պետությունների համագործակցության մասնակից պետությունների համագործակցության մասին» 2000 թվականի նոյեմբերի 30-ի համաձայնագրում փոփոխություններ կատարելու մասին» արձանագրությունը վավերացնելու մասին օրենքի նախագիծը:

Հեղինակը կառավարությունն է, ոստիկանության պետի տեղակալ Արա Ֆիդանյանը ներկայացրել է, որ համագործակցության մասին համաձայնագիրը ՀՀ-ի համար ուժի մեջ է մտել 2001-ի նոյեմբերին, արձանագրությունը ՀՀ կողմից ստորագրվել է 2019-ի հոկտեմբերի 25-ին, այլ երկրների կողմից ևս ստորագրվել է, մի շարք երկրներում՝ ուժի մեջ մտել:

«Փոփոխությունները նպատակ ունեն կարգավորելու թմրամիջոցների ապօրինի շրջանառության պայքարի դեմ ոլորտում մասնակից պետությունների համագործակցությունը, պարունակում է պետությունների միջև տեղեկատվության փոխանակության կարգավորմանն ուղղված դրույթներ»,- ասել է նա:

Պատգամավորները հարցրել են, թե ինչ ֆինանսական ծախսեր է ենթադրում, Ֆիդանյանը պատասխանել է, որ  անհրաժեշտության դեպքում կստեղծվեն համատեղ օպերատիվ քննչական խմբեր, որոնց էլ ուղղված են լինելու ծախսերը:

Սերգեյ Բագրատյանը խնդրել է համագործակցության արտառոց դեպքեր ներկայացնել, որը ցույց կտա, որ տվյալ պետությունն արժանի գործընկեր է:

«Ես կարող եմ ներկայացնել վիճակագրական տվյալներ՝ կապված ՀՀ-ում հայտնաբերված թմրամիջոցների և հոգեմետ նյութերի հետ: 2020-ի հայտնաբերումների թիվը շատ ավելին է՝ 1226 հանցագործության դեպք 19-ի 1088 դեպքի դիմաց: ԱՊՀ շրջանակում միանշանակ համագործակցություն ունենք՝ հատկապես Ռուսաստանի և Բելառուսի հետ, սակայն գտնվելով ԱՊՀ երկրներից մեկուսի՝ հիմնական խնդիրները ծագում են այլ երկրների, դիցուկ՝ մեր հարևան երկրի հետ, իսկ համագործակցությունը առկա է»:

Նշել է, որ արդեն կատարելագործվել են առաքումների մեխանիզմները, լայն տարածում գտել համացանցի միջոցով կատարվող թմրամիջոցների ապօրինի շրջանառության դեպքերը, սահմանների առումով թափանցիկությունը ողջ աշխարհում բերում են հանցավորության որոշ տեսակների աճի:

Նշել է, որ որոշ թմրանյութեր ՀՀ են առաքվում փոստի միջոցով, համագործակցությունը արտասահմանյան գործընկերների հետ դժվարանում է, երբ հետադարձ հասցե չկա, Անդրանիկ Քոչարյանը հավելել է, որ այդ բիզնեսի մեջ ներգրավված հանցավոր աշխարհն ունենում է աջակիցներ ուժային կառույցներում:

«Մեր հասարակությունն էդպիսի դեպքերի մասին շատ է խոսում, բայց այն մարդկանց մասին, որ հովանավորել են դեպքերը, որևէ ձերբակալված ազդեցիկ ուժ չունենք, արժե, որ այս մասին էլ մտածենք: Թե՛ ԱԱԾ-ն, թե՛ ոստիկանությունը հասկացան՝ ինչի մասին եմ ասում, ակնկալում եմ, որ եթե այդ խնդիրը լուծում ենք, մնացածը սկսում են նահանջել»: