Համայնքների խոշորացմամբ ավելի մեծ ուշադրություն կդարձվի փոքր համայնքների խնդիրներին. Սուրեն Պապիկյան

Ես կողմ եմ Հայաստանում համայնքների խոշորացմանը, սակայն դրան պետք է հասնել աստիճանաբար և շատ զգույշ: Այս մասին «Շանթ» հեռուստաընկերության «Հեռանկար» հաղորդաշարի ընթացքում ասել է ՀՀ Տարածքային կառավարման և զարգացման նախարար Սուրեն Պապիկյանը: Նրա խոսքով՝ որևէ փոփոխություն  կատարելուց առաջ կարևոր է իմանալ տվյալ համայնքի ներկայացուցիչների կարծիքն այդ հարցի վերաբերյալ ու այդ ոլորտում առկա խնդիրների ուսումնասիրություն կատարել, որից հետո միայն անցնել գործողությունների փուլին:

«Ակնհայտ է, որ կա խնդիր՝ (համայնքների-խմբ.) խոշորացման հետ կապված, բայց այդ խնդիրներն օբյեկտիվ և սուբյեկտիվ են:

Մի մասում դա եղել են առանց հանրային քննարկումների, առանց հանրային կարծիքը հաշվի առնելու, իսկ այն պարագայում, երբ դրանք լինեն հանրության կողմից քննարկված, խոշորացման կարևորությունը հանրության կողմից ընկալելի լինելուց հետո, այդ պարագայում մենք կունենանք այլ իրականություն:

Նախարարը կարևորում է մեր երկրում համայնքների խոշորացումը, քանի որ, ըստ նրա, այդկերպ հնարավոր կլինի ավելի մեծ ուշադրություն դարձնել համեմատաբար փոքր համայնքների խնդիրներին:

«Մենք Հայաստանում ունենք փոքր ռեսուրս ունեցող համայնքներ, որոնք չեն կարողանում լուծել իրենց կենսական խնդիրները: Այսինքն, մշտապես, պետական բյուջեից տրվող դոտացիայի հաշվին պահում էին անգամ իրենց աշխատակազմերը: Այս պարագայում մենք ունենում ենք արդյունավետ կառավարում: Սակայն, սրան պետք է մոտենալ զգուշորեն, և, գոնե իմ պաշտոնավարման ընթացքում, և մեր կառավարության մոտեցումն է, Հայաստանում չի լինելու գոնե մեկ խոշորացում, որը չունենա հանրային համաձայնություն»,- ասել է Սուրեն Պապիկյանը:

Այս դեպքում արդեն, ըստ նախարարի, մարզպետերի դերն աստիճանաբար կարող է նվազել, քանի որ խոշորացված համայնքների ստեղծման պարագայում, ամբողջական մարզը ղեկավարելու փոխարեն յուրաքանչյուր խոշորացված համայնքի ղեկավարը կզբաղվի իր տարածքի խնդիրներով:

«Այս դեպքում մենք պետք է ժամանակ ունենանք, որ մարզպետարաններին տրված լիազորությունների մի մասը քիչ-քիչ պատվիրակենք խոշորացված համայնքներին»,- ասել է նախարարը: