Ադրբեջանը բլոգերական որս է սկսել

Ադրբեջանը շարունակում է հաշվեհարդար տեսնել Իլհամ Ալիևի վարչակարգին քննադատող ոչ միայն ադրբեջանցի, այլև օտար երկրների քաղաքացիների նկատմամբ: Օրերս Ուկրաինայից առևանգվել է բլոգեր Էլվին Իսաևը, ապա ադրբեջանական միգրացիոն ծառայությունները հայտնել են, որ նա իրենց մոտ է: Բլոգերին մի շարք մեղադրանքներ են առաջադրվել:

Ադրբեջանը նորից որս է սկսել քաղաքական վերլուծաբանների և բլոգերների նկատմամբ: Սա իսրայելցի ճանապարհորդ Ալեքսանդր Լապշինի տարածած տեսաուղերձի հիմնական ասելիքն է: Թեև Լապշինը խոսել է իր նկատմամբ սպառնալիքների մասին, սակայն ադրբեջանական իշխանությունը նաև կոնկրետ գործողություններ է կիրառում՝ այս անգամ Ուկրաինայում:

Էլվինին ոչ մի դեպքում չի կարելի արտաքսել Ադրբեջան, քանի որ նախ նա այնտեղ ոչ ոք չունի և ամենակարևորը՝ Ադրբեջանում նրա կյանքին վտանգ է սպառնում: Որևէ կերպ նա այնտեղ չպետք է ընկնի: Այս տեսաուղերձով ազգությամբ թալիշ, ավելի քան 20 տարի առաջ Ադրբեջանը լքած Էլվին Իսաևի կինը փորձում է աջակցություն ստանալ Ռուսաստանի իշխանությունից: Սանկտ Պետերբուրգում ապրող բլոգերն ադրբեջանական հետապնդումներից խուսափելու համար տեղափոխվել է Ուկրաինա, որտեղ էլ անհետացել է: Օրեր շարունակ որևէ տեղեկություն չի եղել Իսաևի մասին, և միայն ադրբեջանական պաշտոնական հայտարարությունից հետո է պարզ դարձել, որ նա Բաքվում է՝ տեղափոխվել է հատուկ չվերթով: Ճիշտ այնպես, ինչպես Ալեքսանդր Լապշինը կամ Ֆահրադդին Աբոսզոդան:

Էլվինին մեղադրում են անջատողական կոչերի համար, բայց ոչ մի անջատողականություն նրա հայտարարություններում չի եղել: Անհասկանալի միջոցներով նրան փորձում են չեզոքացնել: Անգամ Ուկրաինան է հայտարարել, որ իրենք պաշտոնական մեղադրանք չեն ստացել Էլվինի մասին: Անհասկանալի իրավիճակ է: «Հորիզոն»-ի հետ հեռախոսազրույցում Էլվին Իսրաևի մտերիմներն ու ազգականները խուսափեցին հրապարակել անունները՝ ադրբեջանական հատուկ ծառայությունների թիրախ չդառնալու համար: Իսաևը մեղադրվում է Ադրբեջանի նկատմամբ անջատողական, նաև Իլհամ Ալիևին կյանքին ուղղված կոչեր անելու համար: Սոցիալական ցանցերում թալիշ ակտիվիստի գրառումներում և տեսանյութերում, սակայն, չհանդիպեց որևէ նման հայտարարություն: Առավել շատ քննադատություններ են Ալիևի կլանի հասցեին:

Ադրբեջանական իշխանությունը նրան ատամ է ցույց տալիս: Նրան հաճախ են սպառնացել, որ եթե բերանը չփակի, ապա նրա համար առնվազն շատ վատ կլինի, առավելագույնն էլ կզրկվի կյանքից: Էլվին Իսաևի անհետանալու և Ադրբեջանում հայտնվելու պատմության հետ միաժամանակ հայտնի է դարձել, որ դեռևս սեպտեմբերին Ռուսաստանի դատարանը որոշել է նրան զրկել 2001-ին ստացած քաղաքացիությունից, սակայն որոշումը չի իրագործվել: Դրան զուգահեռ՝ Ադրբեջանը չի դադարեցրել Իսաևի ադրբեջանական քաղաքացիությունը՝ նրա նկատմամբ իրավունքները պահելու համար: Իր հերթին, Ուկրաինան հերքում է տեղեկությունը, թե Էլվին Իսաևին Ադրբեջան են տեղափոխել այդ երկրից: Թե ինչպես է թալիշ բլոգերը մտել Ուկրաինա, և ինչպես է առանց այդ երկրից դուրս գալու հայտնվել Ադրբեջանում, առայժմ որևէ երկրի պատասխանատու մարմին չի բացատրում: