Տեխնոլոգիական ոլորտում մեկ աշխատակցին բաժին ընկնող շրջանառությունը կազմում է 40-50 հազար դոլար. Արշակյան

Տարեվերջյան ամփոփիչ ասուլիսով է հանդես եկել Բարձր տեխնոլոգիական արդյունաբերության նախարար Հակոբ Արշակյանը: Նա նախ` կարևորել է հանգամանքը, որ ռազմարդյունաբերությունն առանձնացվել է Պաշտպանության նախարարությունից, ինչի արդյունքում արտադրողն ու սպառողը առանձին գերատեսչություններում են գործում, ինչն էլ դրական է անդրադառնում երկու ոլորտների աշխատանքի վրա:

«Ռազմարդյունաբերական համալիրը տեղափոխվել է ԲՏԱ նախարարության ենթակայության տակ, կառավարությունում, ստեղծել ենք մի իրավիճակ, որ կա ռազմարդյունաբերությամբ զբաղվող նախարարություն, որի հիմնական առաքելությունն է տեխնոլոգիաներն ու հնարավորությունները կիրառելով ստեղծել ռազմարդյունաբերական ոլորտում նոր մշակումներ, զենքի-զինամթերքի արդիականացման քայլեր իրականացնել, ունենք ՊՆ, որի խնդիրը պաշտպանությունն ապահովելն է: Սա շատ կարևոր փոփոխություն է, արտադրողը և սպառողը տարանջատվել են, սա պոզիտիվ զարգացում է»,- ասել է Արշակյանը:

Ինչ վերաբերում է կատարված աշխատանքի ծավալին, ապա, նախարարի գնահատմամբ, դրական դինամիկա է արձանագրվել: Այսպես, 2015-18թթ. ոլորտում մոտ 28 տոկոս աճ է արձանագրվել: Նախարարը մանրամասնել է.

«Այս տարի վերաբաշխումից տնտեսումների հաշվին շուրջ 1 մլրդ դրամ հատկացվել է հավելյալ ռազմարդյունաբերական համալիրին, նոր մշակումներ ու պրոյեկտներ ստեղծելու համար մենք ռեալիզացրել ենք գումարը, այս երկու օրերին պայմանագրերն ենք կնքում, 2000-ին շատ ավելի մեծ հատկացումներ են լինելու, կրկնապատկվելու է ռազմարդյունաբերական համալիրին հատկացվող գումարի չափը: Մինչ այժմ ֆինանսավորումն իրականացվել է գիտահետազոտական աշխատանքների իրականացման տեսանկյունից, 2020-ին նախատեսել ենք կապիտալ ծախսերի հոդվածներ, որը նշանակում է, որ կապիտալ ներդրումներ նույնպես կունենանք»:

Նա ընդգծել է, որ ինչ և այժմ հնչեցված տարատեսակ թվերը հստակ թվեր չեն եղել, քանի որ դրանք առանձին ռազմարդյունաբերության ոլորտի ծախսերին չեն վերաբերել, իրենք փորձել են տարանջատել այս ծախսերը:

Նախարարը կարևորել է նաև աշխատանքի արդյունքի գեներացումը, որն այս ոլորտում հիմնականում երկրից դուրս է գալիս: Թե ինչ հետևանքներ է ունենում, մանրամասնում է.

«Եթե միջազգային ընկերությունների մասով նայենք, իրենց գլխամասն ԱՄՆ-ում է կամ այլ տեղ է գրանցված, որտեղ շրջանառությունը իրականացվում է, իսկ ՀՀ ուղարկվում են այն գումարները, որոնք աշխատավարձեր են ապահովում, հավելյալ արժեքներն ու այլ միջոցները դրում են մնում: Մեր ուսումնասիրությունները ցույց են տվել, որ տեղի կազմակերպությունները ևս այդպես են աշխատում, ինչի արդյունքում էլ նման փոքր թվեր ենք ունենում շրջանառության տեսանկյունից, մեծ թիվ է, բայց մեր պատկերացումն ավելի մեծ պետք է լիներ: Մեկ աշխատակցին բաժին ընկնող շրջանառությունը լինում է մոտ 16,500 դոլար, այնինչ գիտենք, որ տեխնոլոգիական ոլորտում առնվազն 40-50 հզր դոլար պետք է լինի, երեք անգամ այս թիվը պակաս է իրականում գեներացվող շրջանառությունից: Պետք է դիտարկենք մեխանիզմներ, որ այդ ընկերություններն իրենց ամբողջ գումարը շրջանառեն Հայաստանում»,- նշել է Արշակյանը: