Այն, որ ասում են՝ Փաշինյանն ուզում է հանձնել Ղարաբաղը, դա պարզապես քաղաքական հիստերիա է. Արման Նավասարդյան

Այսօր ԱԺ-ում արտաքին հարաբերությունների մշտական հանձնաժողովի նիստից հետո հանձնաժողովի նախագահ Ռուբեն Ռուբինյանը, պատասխանելով լրագրողների հարցերին, նշեց, որ պարտադիր չէ, որ կառավարության ծրագիրը շատ դետալային լինի, պետք է ներկայացնի հիմնական ռազմավարությունը: Իսկ ինչպիսի՞ ռազմավարության վրա է հիմնված իշխանության արտաքին քաղաքականությունը:

Հիմնական ուղղությունները նույնն են, իսկ թե ի՞նչ է փոխվել ու ի՞նչ պետք է սպասել, այս մասին SHANTNEWS.am-ի հետ զրույցում մանրամասնել է ՀՀ արտակարգ և լիազոր դեսպան Արման Նավասարդյանը:

«Արտաքին քաղաքական վեկտորները, որոնք կային մինչ այդ, հիմնականում մնացել են ուժի մեջ, ինչպես նաև ներքաղաքական, պարզապես որոշ ձևաչափեր, մեթոդներն են փոխվել, եթե խոսենք առաջնայնության առումով, ունենք առաջին հերթին ԼՂՀ հարցը, որը, կարծում եմ, կզարգանա այնպես, ինչպես որ հայտարարվել է»,-նշեց նա:

Իսկ հայտարարվել է մի քանի կարևոր դրույթ. այն, որ Հայաստանը կողմ է հարցի՝ Մինսկի խմբի շրջանակներում լուծմանը և ԼՂ -ը ևս պետք է դառնա բանակցային կողմ: Խոսելով վերջինիս մասին՝ Նավասարդյանն ասաց.

«Սա 98-ին ընդհատված գործընթաց էր, և մինչև 98 թ-ը ԼՂՀ-ն բանակցային կողմ էր: Շատ ճիշտ շեշտադրում է այդ մոտեցումը, որովհետև միջազգային և բոլոր տեսակի իրավունքների առումով տարօրինակ է, որ երրորդ երկրի համար երկու երկիր բանակցում է, և այդ երրորդ երկիրը չի մասնակցում, սա նոնսենս է, սա առաջացրել է դիմադրություն Ալիևի ու մյուսների կողմից, ժամանակի ընթացքում կարծում եմ, որ կգտնի իր տեղը»:

Ինչ վերաբերում է ձևաչափին, ապա, բացի Մինսկի խմբի համանախագահների շրջանակում կարգավորումից, այլ մեխանիզմ չի կարող գործել, կարծում է դիվանագետը:

«Ամենակարևորն այն է, որ Փաշինյանը հայտարարել է այն մասին, որ խնդիրը միայն կլուծվի ժողովրդի կամարտահայտության միջոցով: Այն ամբողջ հակահեղափոխական պրոպագանդան, որ հիմա կատարվում է, և ասում են, որ Փաշինյանն ուզում է հանձնել Ղարաբաղը, դա պարզապես քաղաքական հիստերիա է և դեզինֆորմացիա, նման բան չի կարող տեղի ունենալ: Տարածքների հանձնման վերաբերյալ խոսք լինել չի կարող, դա հակացուցված է մեր արտաքին քաղաքականության գործընթացին, պետական և ազգային շահերին»:

Նա որևէ վտանգ չի տեսնում այս հայտարարություններում, իսկ կառավարության ծրագրում կարևորում է նաև այլ երկրների հետ հարաբերությունները, շեշտադրում հատկապես բոլոր ուղղություններով քաղաքականության ներառման կարևորությունը: Սրանց արդյունքում է, որ Հայաստանը դառնում է կապող օղակ Արևմուտքի ու Արևելքի միջև, և, ըստ էության, միջնորդի դեր ստանձնում:

«Հայաստանը մնում է ՌԴ դաշնակիցը և բոլոր միջազգային կազմակերպություններում նրա ալյանսը, միաժամանակ պետք է զարգացնի Ամերիկայի հետ, Ռուսաստանի հետ…, Մերկելի հետ հաջող բանակցություններ եղան, և առջևում այդպիսի կարևոր այցելություն է լինելու, ինչպիսին Իրանն է: Շատ եմ կարևորում որպես փոքր պետության միջնորդային գործողությունների դերը, և որպես փրկօղակ՝ սպասելիքներ ունեն մեզնից և՛ իրանցիները, և՛ ռուսները, և՛ անգամ եվրոպական երկրները»,-ընդգծեց  դեսպանը:

Ըստ Նավասարդյանի՝ ԵվրԱզԷՍ և ՀԱՊԿ անդամ լինելը, ԵՄ, ՆԱՏՕ-ի հետ համաձայնագրեր ունենալը մեծ դեր է խաղում Հայաստանի բազմակողմ քաղաքականության մեջ, ինչպես ինքն է բնորոշում, «բազմակողմ քաղաքականության հորիզոններ են բացվում»: