Տարբեր տարիներին քաղաքի տարբեր հատվածներում կառուցվել են ինքնակամ շինություններ․ Գյումրիում ապօրինի շինությունների հաշվառման վերջնաժամկետը 2024 թ․-ի հունվարի 1-ն է

Գյումրիում ինքնակամ շինությունների կառուցումն անհասցե ու անկանոն սկսվեց 1988-ի երկրաշարժից հետո։ Քաղաքի տարբեր հատվածներում տնակներ տեղադրվեցին, հետո բնակարանի փոխհատուցման հույսը կորցրած ընտանիքները տնակները քարապատեցին՝ դրանք համարելով հիմնական բնակության վայր։ Հիմա դրանցից ոչ բոլորն են օրինականացված, շատ դեպքերում քաղաքաշինական նորմերի խախտումների պատճառով։

Հիմա ապօրինի շինությունների օրինականացման նոր որոշումը նոր հնարավորություն է ստեղծել և սեղմ ժամկետներ է պարտադրում քաղաքացիներին։ Այն վերաբերում է մինչև  2021թ․-ը կառուցված ինքնակամ շինություններին՝ հստակ ժամկետներով։ Գյումրիի համար դա մինչև 2024 թ․-ի հունվարի 1-ն է։

«Մինչև 2021թվականը տարբեր տարիներին կառուցվել են ինքնակամ շինություններ, որոնց մի մասը օրինականացվել է, մի մասն էլ մնացել է ապօրինի կարգավիճակով՝ տարբեր պատճառներով։ Որոշ դեպքերում ինքնակամ շինություններ կատարողները չեն դիմել, մյուս կողմից քաղաքապետարանը համապատասխան միջոցառումներ չի ձեռնարկել, և մենք ունենք որոշակի քանակությամբ ապօրինի շինություններ»,- ասում է Գյումրիի գլխավոր ճարտարապետ Հենրիկ Գասպարյանը։

Ապօրինի շինությունների քանակի որոշակիությունը հասկանալու համար գործընթացը մեկնարկելու է չափագրումներից, ինքնակամ շինությունների տերերից կադաստրում փաստաթղթեր  ներկայացնելուց և հաշվառելուց հետո։ Նախնական թիվ ու տվյալ, ապօրինի շինությունների վերաբերյալ, դեռ մեկ տարի առաջ շրջանառվում էր 2700-ը։

«Հիմնական ապօրինի շինությունների ցանկ մենք վերջնականապես չունենք, որ մենք գիտենանք, իսկ հաշվառումը կադաստրում է կատարվելու, իսկ 2700 շինության մասին այլ հարց կար, 2700-ը այն շինություններն էին, որոնք բացակայում էին կադաստրային քարտեզից, որոնք ինչ-ինչ պատճառներով կադաստրային քարտեզում արտացոլված չէին»,-ընդգծում է Գյումրիի գլխավոր ճարտարապետը։

Կադաստրի պետական կոմիտե չափագրման փաստաթղթերը ներկայացնելուց հետո միայն ինքնակամ կառուցված շինությունները կհամարվեն հաշվառված, իսկ հաջորդ քայլն արդեն կառույցների օրինականացման կամ մերժմանն է վերաբերում, որն արդեն ՏԻՄ-ի գործառույթն է։

«Եթե շինության օգտագործողը, տիրապետողը նման հարցով դիմել է  համայնքապետարան, համայնքապետարանը կքննարկի այդ հարցը, եթե այն չի հակասում գլխավոր հատակագծին, քաղաքաշինական և շինարարական նորմաներին համապատասխանում է, ուրիշների իրավունքները չի  խախտվում, ինչպես նաև մարդկանց կյանքին և առողջությանը վտանգ չի սպառնում, էդ դեպքում կճանաչվի նրանց  սեփականության իրավունքը»,-նշում է Հենրիկ Գասպարյանը։

Վերը նշված չափորոշիչներին չհամապատասխանող շինությունները, գլխավոր ճարտարապետի ասելով՝ կդիտվեն որպես քանդելու ենթակա շինություններ։ Թեև այնպես չէ, որ միանշանակ կքանդվեն բոլոր ինքնակամ շինությունները, ստեղծված է հնարավորություն դրանք օրինական դաշտ բերելու համար։ Տվյալ պարագայում խոսքը վերաբերում է  քաղաքի գլխավոր  հատակագծի փոփոխությանը։ Հիմնականում Գյումրիում խնդիրը կանաչ գոտիներն են, որոնց տարածքներն ու սահմանները  անհասկանալի են բնակիչների համար։

Օրենքի փոփոխության արդյունքում մեկ տարուց էլ քիչ ժամանակ է մնում, որպեսզի բնակիչները օրինականացնեն իրենց ինքնակամ շինությունները։ Գյումրիի դեպքում խնդիրն ավելի բարդ է, քանի որ քաղաքի բոլոր հատվածներում կան ինքնակամ շինություններ, որոնք կառուցվել են հողի օգտագործման օրենքի խախտումներով։

«Ովքեր ունեն ինքնակամ կառուցված շինություններ մինչև 2024 թ․-ի հունվարի 1-ը հաշվառման կանգնեն կադաստրի կողմից։ Հակառակ դեպքում նրանք հնարավորություն չեն ունենա  այլևս օրինականացնելու։ Մենք չենք կարողանալու քննարկել այդ օրինականացման հարցը, կարող  ենք քննարկել, եթե հաշվառված լինեն։ Բայց հաշվառում չի նշանակում, որ միանաշանակ օրինականացման ենթակա է տվյալ շինությունը»,- շեշտում է Գյումրիի գլխավոր ճարտարապետ Հենրիկ Գասպարյանը։

Քաղաքացիներն արդեն դիմում են ինքնակամ շինությունները չափագրելու և օրինականացնելու համար։ Շինության կառուցման ժամանակաշրջանը ճշտվում է հին ու նոր էլեկտրոնային քարտեզների և փաստաթղթերի միջոցով։

2022թ․-ի հունվարի 1-ից  հետո Գյումրիում ապօրինի շինությունների վերաբերյալ կազմվել է 36 արձանագրություն։