Վրաստանում ստեղծվում է ընդդիմության երկրորդ ճակատը. կարծիքներ Թբիլիսիից

Թելավիում Վրաստանի նախագահ Սալոմե Զուրաբիշվիլիի երդմնակալության շուրջ առաջացած լարվածությունը պահպանվում է: Իշխանությունն ու ընդդիմությունը մեղադրում են միմյանց Թելավիի ճանապարհին ոստիկանության և ընդդիմության միջև տեղի ունեցած բախումների համար: Երկու կողմից էլ տուժածներ կան:

Վրաստանի նախագահ Սալոմե Զուրաբիշվիլիի երդմնակալության ժամանակ Թելավիում ընդդիմության հրահրած միջադեպից հետո երկրում լարվածությունը պահպանվում է: Երդմնակալության արարողությունը խափանելու անհաջող փորձից հետո Թբիլիսի վերադարձած ընդդիմությունը բողոքի ակցիա է իրականացրել, խորհրդարանի շենքի առջև վրաններ են տեղադրվել:

Միավորված ընդդիմությունը հայտարարել է դեկտեմբերի 18-ից սկսվող շարունակական ակցիաների մասին: Նախագահի պարտված թեկնածու Գրիգոլ Վաշաձեն, մասնավորապես, ասել է.

«Մենք պահանջում ենք հնարավորինս կարճ ժամանակում անցկացնել խորհրդարանական ընտրություններ, փոփոխել ԿԸՀ կազմը և ընտրություններ անցկացնել համամասնական ընտրակարգով: Իշխանությունները պետք է ընդգրկվեն քաղաքական գործընթացում և քրեական մեթոդներից վերադառնան քաղաքական գործընթաց»:

Վրաստանի ՆԳՆ-ն հայտարարություններ է տարածել Վաշլիս-Ցիխեի մոտ տեղի ունեցած իրադարձությունների կապակցությամբ: Ըստ այդ հայտարարության՝ ոստիկանությունը բազմիցս զգուշացրել և հորդորել ընդդիմության ներկայացուցիչներին զերծ մնալ բռնություններից ու անօրինություններից: Ըստ ընդդիմադիր աղբյուրների՝ ոստիկանական բռնության զոհ են դարձել խորհրդարանի անդամներ, լրագրողներ, հասարակ քաղաքացիներ: Ընդդիմության գործողությունների հետևանքով տուժել է 10 ոստիկան, փչացել է ավելի քան 10.000 լարի արժողությամբ ՆԳՆ տեխնիկա: Ագրեսիվ գործողությունների մեղադրանքով ձերբակալվել է ընդդիմադիր առաջնորդներից Դավիթ Կիրկիտաձեն: ՆԳՆ-ն կոչ է արել ընդդիմությանը զերծ մնալ իրավիճակի հետագա սրումից:

Վրաստանում ծավալված իրադարձություններին արձագանքել է ԱՄՆ դեսպանի պաշտոնակատար Ռոս Ուիլսոնը: Նրա խոսքով՝ Միացյալ Նահանգները սատարում է խոսքի ազատությանը, բայց դա պետք է արվի խաղաղ ճանապարհով: Վրաստանում ստեղծված իրավիճակը գնահատել են նաև վերլուծաբանները:

Դավիթ Լոսաբերիձե

Քաղաքագետ Դավիթ Լոսաբերիձեն SHANTNEWS.am-ին տված հարցազրույցում ասաց. ««Վրացական երազանք» կուսակցությունն արդեն 6 տարի իշխանություն է, և բնական է, որ հասարակությունը պետք է դժգոհություններ ունենա: Վրաստանում տեղի ունեցող գործընթացների հետևում իշխանության սխալ քաղաքականությունն է, սակայն ճիշտ չէ դատողություններ անել` նայելով այսօրվա իրադարձություններին: Դեռ պետք է սպասել 1-2 ամիս, հասկանալ, թե ինչ է կատարվում, ինչ ռազմավարություն են մշակել ընդդիմադիրները և ինչպես են աշխատելու իշխանությունները, մանավանդ, որ նախագահի դերակատարումը էականորեն փոքրացել է»:

Ընդդիմությանը Եվրոպայից աջակցում է Վրաստանի նախկին նախագահ Միխեիլ Սաակաշվիլին: Դեռ երեկ երեկոյան նա ֆեյսբուքյան իր էջում բոլոր համախոհներին հորդորել է միանալ ցույցին: Սաակաշվիլին նաև դիմել է տաքսիների և միկրոավտոբուսների վարորդներին և կոչ արել Վրաստանի քաղաքներից և գյուղերից բոլոր ցանկացողներին անվճար տեղափոխել Թբիլիսի՝ ընդդիմության բողոքի ակցիաներին մասնակցելու:

Նիկա Չիտաձե

Վրացի մեկ այլ քաղաքագետ՝ Նիկա Չիտաձեն, SHANTNEWS.am-ի հետ զրույցում ասաց, որ ընդդիմությունը երկրորդ ճակատով է աշխատելու, որն ավելի կարևոր է:

«Նրանք մոտ մեկ միլիոն ստորագրություն պետք է հավաքեն, ինչը հնարավորություն կտա արտահերթ խորհրդարանական ընտրություն կազմակերպել: Այդ առումով ճիշտ էր Սաակաշվիլիի կոչը, որ բոլորը մեկ մարդու պես միմյանց օգնեն և Վրաստանի տարբեր կողմերից հավաքեն իշխանությունից դժգոհող մարդկանց: Դրա շնորհիվ ստորագրություններն ավելի արագ կհավաքվեն»:

Ի դեպ, Վրաստանի սահմանադրագետները երկրի պատմության մեջ աննախադեպ իրադարձություն են համարել Սալոմե Զուրաբիշվիլիի երդմնակալությունը. վերջինս երդվել է Սահմանադրության վրա՝ առանց դադարեցնելու պատգամավորի իր լիազորությունները: