Ինչո՞ւ են պատգամավորները հիշել «սև ու սպիտակի», «ասֆալտին փռելու», «Ամանորին բլինչիկ չուտելու» պատմությունները. թեժ բանավեճ ԱԺ-ում

Ո՞ր դեպքում պետք է պատժվի ատելության խոսքի քարոզը, երբ այն ուղղված է խոցելի խմբերի՞, թե՞ բոլորի, այդ թվում՝ քաղաքական գործիչների դեմ: Հարցն այսօր բուռն քննարկման թեմա է դարձել ԱԺ-ի Մարդու իրավունքների պաշտպանության և հանրային հարցերի հանձնաժողովի արտահերթ նիստում:

Հանձնաժողովի նախագահ Նաիրա Զոհրաբյանը հիշել է հեղափոխությունից հետո ատելության խոսքի դրսևորումները, «Լուսավոր Հայաստանից» Անի Սամսոնյանը նրան հիշեցրել է նաև «սև ու սպիտակ»-ի պատմությունը, որին իր խոսքում անդրադարձել է «Իմ քայլը» խմբակցության անդամ Մարիա Կարապետյանը:

«Սև ու սպիտակի մասին, քաղաքապետի հնչեցնելու հաջորդ օրը վարչապետն ասաց՝ այո, գուցե ոչ հաջող ձևակերպում էր, մեր հասարակությունը շատ ավելի վառ գույներով կարելի է ներկայացնել, հնարավոր էր, չէ՞, կառչել սրանից ու ասել, ահ, գույներ եք ասում, ուրեմն ձեր մտքին շատ ուրիշ բաներ կան, դրանից հետո էլ մի քանի անգամ թե՛ այդ արտահայտությունը, թե՛ «ասֆալտին փռել» հայտարարությունը օգտագործվել է կոնկրետ հանցագործների նկատմամբ, եթե հանցագործը փախնում է, ինչ են անում՝ փռում են ասֆալտին, ուզում եմ ասել, որ եկեք չկտրենք կոնտեքստից»,- ասել է նա:

Սարգիս Խանդանյանը, որ նախաձեռնության հեղինակն է, ասել է.

«Օրենքի շեշտադրման մեջ նշենք, որ սա չի կարող ազդել քաղաքական այլախոհության դեպքում, սա խոցելի խմբերի համար է, ոչ թե խոսքի ազատությունը սահմանափակելու»:

Անի Սամսոնյանն արձագանքել է․

«Դուք խոսում եք ատելության խոսքից, միևնույն ժամանակ հույս ենք հայտնում, որ այն լինելու է անաչառ աշխատանքային խումբը, իսկ դուք սկսում եք արդարացնել սև ու սպիտակը, ասֆալտին փռելը, ինչ է նշանակում հանցագործներին ասֆալտին փռել, լիքը մարդ կա, ում մեղքն ապացուցված չէ, ու ասում եք, ճիշտ է նրանց նկատմամբ ասել ասֆալտին փռել, կամ թաթիկներ կտրել, միգուցե դուք էլ արդարացնեք ու ասեք, որ դա, միգուցե, բռնության կոչ չի, կամ ատելության կոչ չի, իսկապես չեմ հասկանում՝ ինչ եք ուզում»:

Մարիա Կարապետյանը նրան կոչ է արել կենտրոնանալ մյուս գույների վրա:

Հաջորդել է Անի Սամսոնյանի դիտարկումը.

«Ես ուզում եմ ասել, որ ունեցել է հետևանքներ, ի՞նչ գույնզգույն, մենք՝ քաղաքական գործիչներս, խոցելի չե՞նք»:

Մարիա Կարապետյանը հայտարարել է, որ ինքն իրեն խոցելի չի զգում:

Արդյունքում սկսել են քննարկել հարցը, թե ինչու կարգավորումը չի տարածվում քաղաքական գործիչների վրա:

Մանրամասները՝ տեսանյութում: