Դիմանկարներով, երաժշտությամբ և տոնական տրամադրությամբ հագեցած օր «Աբովյան» քրեակատարողական հիմնարկում

Հայաստանի Հանրապետության Ազգային ժողովի մարդու իրավունքների պաշտպանության և հանրային հարցերի մշտական հանձնաժողովը, «Ազգային արժեք» մշակույթի համահայկական հիմնադրամի հոգաբարձուների խորհրդի որոշմամբ և խորհրդի հետ համատեղ, ՀՀ ԱՆ քրեակատարողական հիմնարկներում իրականացնելու է մշակութային միջոցառումների շարք՝ հանդիպումներ ստեղծագործողների հետ, համերգներ, վարպետաց դասեր, մրցույթներ և այլն:

Այդ նպատակով նախաձեռնած առաջին միջոցառումն իրականացվեց ՀՀ ԱՆ «Աբովյան» քրեակատարողական հիմնարկում, որտեղ դեկտեմբերի 15-ին հյուրընկալվել էին Հայաստանի Հանրապետության և Ռուսաստանի Դաշնության  նկարիչների և ճարտարապետների միության անդամ, «Ազգային արժեք» հիմնադրամի հոգաբարձուների խորհրդի նախագահ Աշոտ Թադևոսյանը՝ դստեր՝ Նարե Թադևոսյանի հետ, ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, պատգամավոր Նաիրա Զոհրաբյանը, պատգամավորներ Իսայան Շաքեն, Ղազարյան Թագուհին, Հովհաննիսյան Արթուրը և Ստեփանյան Տիգրանը:

Ն. Զոհրաբյանը, հանդես գալով բացման խոսքով, նախ շնորհավորեց ներկաների գալիք տոները, ապա ներկայացրեց միջոցառման նպատակն ու խորհուրդը, այն է՝ արվեստի միջոցով գեղեցիկ և լուսավոր օր նվիրել ազատությունից զրկված անձանց:

Ներկաներին ողջույնի խոսք ասաց նաև Աշոտ Թադևոսյանը՝ հավելելով, որ մշակույթը, արվեստն այն լավագույն միջոցներն են, որոնց օգնությամբ փոխվում է մարդու վերաբերմունքը կյանքի, շրջապատի, մարդու և սեփական անձի նկատմամբ: Այնուհետև նրա մասնակցությամբ իրականացվեց միաժամանակյա նկարչության մրցույթ, որի ժամանակ դատապարտյալ կանայք նկարում էին Ա. Թադևոսյանին, իսկ վերջինս՝ դատապարտյալ կանանց: Լավագույն նկարների 4 հեղինակները հյուրերի կողմից արժանացան պարգևների:

Միջոցառման ողջ ընթացքն ուղեկցվում էր քանոնահարուհի Մարիաննա Գևորգյանի կենդանի կատարմամբ: Հատկանշական է, որ ազատազրկված կանանցից մեկն օրվա խորհուրդն ամբողջացրեց իր երգարվեստով. նրա կատարմամբ հնչեցին ազգային, հայրենասիրական երգեր:

Շնորհակալություն հայտնելով ՀՀ արդարադատության նախարարությանը, քրեակատարողական ծառայությանը և հիմնարկի անձնակազմին նման բացառիկ օր իրականացնելու համար՝ միջոցառման կազմակերպիչներն ազդարարեցին նաև «Ես սիրում եմ իմ երկիրը» թեմայով մրցույթի մասին, որն իրականացվելու է քրեակատարողական բոլոր հիմնարկներում և նվիրված է լինելու Հայաստանի Հանրապետության անկախության օրվան: Մրցույթին ներկայացված աշխատանքները՝ խեցեգործություն, քանդակ, ձեռագործություն, կտավ և այլ ոճի աշխատանքներ, ցուցադրվելու են Անկախության օրը Նկարիչների միության շենքում: Լավագույն աշխատանքների հեղինակներն արժանանալու են դրամական պարգևատրումների:

Իր հերթին միջոցառման կազմակերպիչներին շնորհակալություն հայտնեց ՀՀ ԱՆ «Աբովյան» քրեակատարողական հիմնարկի պետ, արդարադատության գնդապետ Արմեն Մարտիրոսյանը՝ նշելով հատկապես, որ այս միջոցառումը բովանդակային առումով և տրամադրությամբ եզակիներից մեկն էր մինչ այս իրականացված միջոցառումների շարքում:

Օրը տոնական և հիշարժան դարձնելու համար երախտիքի խոսքեր հայտնեցին նաև դատապարտյալ կանայք:

   ՀՀ ԱՆ քրեակատարողական ծառայության հանրային կապերի բաժին