Շիրակի մարզում գրիպի H1N1 վիրուսը չի նահանջել, բայց հիվանդների թիվը պակասել է

Գյումրիի հիվանդանոցներում սուր շնչառական վարակներով հիվանդների թիվը փոքր-ինչ նվազել է դեկտեմբեր և հունվար ամիսների համեմատ։ Սեզոնային այս վիրուսը հիվանդության բավականին լուրջ ընթացք ունի, ուղեկցվում է բարձր ջերմությամբ, հազով, թուլությամբ և այլն։ Վիրուսն ավելի շատ բարդություններ է ստեղծում երեխաների համար։ Գյումրիի ինֆեկցիոն հիվանդանոցում բուժսպասարկումը շարունակվում է արտակարգ ռեժիմով։

Մեկ-երկու օր առաջ հոսպիտալացված երեխաների մոտ մանկաբույժը հերթական զննության ժամանակ առողջական վիճակի դրական տեղաշարժ է արձանագրում։ Ծնողները նկարագրում են, թե մինչև հիվանդանոց դիմելը ինչ վիճակում են եղել երեխաները։ Տնային պայմաններում 4-5 օրյա բուժումն արդյունք չի տվել։

Գրիպի այս վիրուսն իր բարդ ընթացքով տարբերվող է։ Երեխաների ծնողներն են պատմում, որ փորձել են փոքրիկներին տնային պայմաններում բուժել, բայց արդյունք չի եղել ու մինչև 40 աստիճան ջերմությամբ նրանց տեղափոխել են հիվանդանոց: Երեխաների մոտ ի հայտ եկած ախտանշանները բնորոշ են Հայաստանում տարածված սուր շնչառական վարակին։ Այն բժիշկների համար նոր տեսակի վիրուս չէ, դրա դեմ պայքարի միջոցները նույնն են ու հիմնականում ոչ դեղորայքային։

Գյումրիի ինֆեկցիոն հիվանդանոցի բաժանմունքի վարիչ Կարինե Հովհաննիսյանի խոսքերով` շրջանառության մեջ է գրիպի H1N1 վիրուսը, որը հանրապետությունում տարածում է ունեցել նաև 2009-2010, 2011-2013 և 2018 թվականներին: Հիմա այն համեմատաբար մեղմ ընթացքով է, բայց դարձյալ հիվանդների համար բարդություններ է ստեղծում:

H1N1 վիրուսի ընթացքը 5-7 օր գաղտի շրջանով է, սկզբնական փուլում ունենում է գրիպին ոչ բնորոշ ախտանշաններ՝ սրտխառնոց, փսխում, լուծ, իսկ հետո արագ դրան հաջորդում է մինչև 40 աստիճան ջերմությունը, հազը, ախորժակի բացակայությունը։ Ի տարբերություն մեծահասակների` ավելի խոցելի են երեխաները։ Մանկապարտեզներում և դպրոցներում բացակայությունների թիվը փետրվարի առաջին տասնօրյակում ավելացել են:

Գյումրիի ինֆեկցիոն հիվանդանոցում խստացված ռեժիմ է, հիվանդների հետ տեսակցությունները սահմանափակել են, սահմանվել է օրական 2 ժամ։ Բուժանձնակազմը շնչադիմակներով է, տեսակցողների մուտքը՝ ևս։ Կանխարգելիչ միջոցառումներն այսքանով չեն սահմանափակվում։ Բակտերիոցիտ լամպի ուլտրամանուշակագույն ճառագայթները 100 տոկոսով ոչնչացնում են օդում վիրուսները։

Ուժեղացված հսկողությունը նաև մարզի օդային ու ցամաքային անցակետերում է, սա արդեն պայմանավորված է կորոնավիրուսով, որի հայտնաբերման թեստերը միայն մայրաքաղաքի վիրուսոլոգիական լաբորատորիաներն ունեն։

Ըստ բժիշկների՝ անհրաժեշտության դեպքում մարդու քիթ-ըմպանային քսուքից նմուշ է վերցվում, ուղարկվում Երևան՝ ախտորոշման, որի արդյունքները պատրաստ են լինում 12 ժամվա ընթացքում:

Հիվանդանոցներ ընդունվածների շատ փոքր թիվն է բուժօգնության առաջնային օղակից՝ պոլիկլինիկաներից ուղղորդվում։ Միանգամից դիմում են հիվանդանոցներ։ Գյումրիի ինֆեկցիոն, Մոր և մանկան ավստրիական հիվանդանոցներում մահճակալային ծանրաբեռնվածությունը հասնում է մոտ 90 տոկոսի։