Անելանելի վիճակներ չկան, եթե ունես կամքի ուժ. Սարգիս Ստեփանյան

ՀՀ Զինված ուժերի փոխգնդապետ, հատուկ ջոկատային, հետախույզ Սարգիս Ստեփանյանի պատմությունը շատերին է հայտնի։ 2014-ին ծանր վիրավորվելու պատճառով նա կորցրել է երկու ոտքն ու աջ ձեռքը, բայց կարողացել է կյանք վերադառնալ։ Դժվարություններ հաղթահարած այս մարդու մասին է նաև «ԲազկամարԴը» գիրքը։ Հերոս Սարգիս Ստեփանյանի և գրքի հեղինակի հետ էր հանդիպումը Կառնուտի միջնակարգ դպրոցում։

2014 թվականին հակառակորդի դիվերսիոն հարձակման ժամանակ է վիրավորվել՝  արկի պայթունից կորցնելով երկու ոտքն ու ձեռքը, երբ վիրավոր զինվորին էր մարտի դաշտից դուրս բերում։ Ծանր վիրավորումից ամիսներ անց Սարգիսը սկսում է քայլել, զբաղվել սպորտով, հռչակվում է բազկամարտի Եվրոպայի և Աշխարհի բազմակի չեմպիոն։ Սարգիսն իր օրինակով է ապացուցում, որ անհնարին ոչինչ չկա։

«Ամենադժվարը, այո՛, պետք է կարողանաս ինքդ քեզ հաղթել, որովհետև դա հեշտ չէ, եթե կարողանում ես հաղթանակած դուրս գալ ինքդ քեզ հետ, արդեն հեշտ  է լինում առօրյա  կյանքդ, կենցաղը հաղթահարել։ Բանաձևը չեմ կարծում, որ շատ բարդ է, պետք է կարողանաս հաշվի նստել քեզ հետ, պետք է կարողանաս ամեն օր ամփոփել քո օրը, հասկանաս, թե որտեղ ես թերանում, սխալվում, որպեսզի էդ սխալները ուղղես։ Որտեղ պետք է ուժեղ գտնվես, քո ծույլ տեղերը իմանալով քեզ ոտքի ես կանգնեցնում, արդեն առհասարակ հեշտանում է առօրյա կյանքը»,- աշակերտների հետ հանդիպմանը նշեց փոխգնդապետ, հետախույզ Սարգիս Ստեփանյանը։

Այդ դժվարությունները հաղթահարելով միմիայն ուժեղացել է իր հանդեպ ունեցած խստապահանջության շնորհիվ՝ վայել ինչպես զինվորականին։ Եվ այս բանաձևով է առաջնորդվում՝ օգնելով այն զինվորներին, որոնք հաշմանդամություն են ձեռք բերել պատերազմի պատճառով։ Սարգիսը հիմնել է հայ հերոսների վերականգնողական կենտրոն։ Հերոս զինվորականը մեր հերոսների կողքին է։

«Մենք սովորաբար պատմում ենք հերոսների մասին, որոնք չկան, մենք հնարավորություն չունենք նրանց հետ խոսելու, նրանց լսելու, բայց էս դեպքում մենք ունենք շատ լավ հնարավորություն հենց  իրական հերոսին տեսնելու, հենց գրքի  առանձին պարբերություններին իրականում  անդրադառնալու ու մանրամասն քննարկելու։ Գրքի հերոսը ձեր դիմաց նստած է»,- այսպես իր խոսքը սկսեց  «Բազկամարդը» գրքի հեղինակ Դավիթ Դավթյանը։

Հեղինակը՝ Դավիթը, նշում է, որ այս գիրքը բոլոր նրանց համար է, ովքեր միայն հաղթելու և պայքարելու մոտիվացիա ունեն։«Արիության համար» մեդալը Սարգիս Ստեփանյանի անկոտրում կամքի, իր առաքելության խորհրդանշանն է։ Նա շարունակում է ծառայե լՀՀ Զինված ուժերում ու դեռ երկար պատրաստ է կրել զինվորական համազգեստը։

«Ես մտածում եմ և վստահ եմ, որ դեռ անելիքներ ունեմ հայոց բանակում և պետք է դեռ երկար ծառայեմ, մեր նման տղաները պիտի երկար ծառայեն և իրենց օրինակով, իրենց փորձով օգուտ տան Հայոց բանակին։ Մենք մեր տեսակով պետք է ոգեշնչենք մեր ազգին և պետք է քայլ առ քայլ ուժեղանանք, ոտքի կանգնենք, որ ցանկացած խոչընդոտի, ցանկացած դժվարության առաջ պատվով կանգնենք»,- շեշտում է փոխգնդապետ Սարգիս Ստեփանյանը։

Այս աշակերտների համար նա ևս դարձավ ոգեշնչման օրինակ։ Սարգիսն իր առաքելությունն է համարում նաև մյուսներին օգնելն ու իր հետևից տանելը: