Տրանսպորտային միջոցների բաղադրիչ մասերի, սարքերի կամ սարքավորումների գողությունների համար կսահմանվի ավելի խիստ պատիժ

Նախատեսվում է տրանսպորտային միջոցների բաղադրիչ մասերի, սարքերի կամ սարքավորումների գողությունը դիտարկել գողության հանցակազմի 2-րդ մաս, որի պարագայում այն ոչ մեծ ծանրության հանցանքի փոխարեն կորակվի միջին ծանրության հանցանք, եւ օրենքի նախագիծն ընդունվելուց հետո հանցանք կատարած անձը կպատժվի առավել բարձր պատժաչափերով:

Գործադիրը նման կարգավորում է նախատեսում Քրեական օրենսգրքում: Առաջարկվող լրացումը ներկայացրել է ՀՀ ներքին գործերի նախարարի տեղակալ Արմեն Մկրտչյանը: Նրա խոսքով վերջին տարիների վերլուծությունները փաստում են, որ այս արարքն ունի տարածվածություն, կայուն աճի միտում եւ վտանգավորությամբ չի կարող դիտարկվել ոչ մեծ ծանրության հանցագործություն, եւ պետության արձագանքը պետք է լինի համարժեք: Արարքը սահմանելով միջին ծանրության՝ մասնավոր մեղադրանքի տիրույթից այն կտեղափոխվի հանրային մեղադրանքի տիրույթ:

Ի պատասխան ՀՀ ԱԺ նախագահ Ալեն Սիմոնյանի հարցադրմանը՝ Արմեն Մկրտչյանը պարզաբանել է, որ խոսքը վերաբերում է, մասնավորապես, մեքենաների հաշվառման համարանիշերի, նշանների, հայելիների կամ լուսարձակների տարածված գողությանը:

ՀՀ ԱԺ նախագահ Ալեն Սիմոնյանը փորձել է պարզել՝ ի՞նչ այլ քայլեր են նախատեսվում, քանի որ միշտ չէ, որ հանցանքի պատիժը խստացնելը դրական արդյունքներ է տալիս:

«Կոնկրետ այս գործերով բռնված անձանց քանի՞ դեպք կա»,- Ալեն Սիմոնյանի հարցին ի պատասխան՝ փոխնախարարը նշել է, որ կատարված հանցագործությունների 30 տոկոսի չափով հայտնաբերված անձինք կան եւ հավելել՝ խնդիր ունենք դատական եւ քննչական պրակտիկայում:

«Ծանրացնելով արարքը, տանելով միջին ծանրության տիրույթ՝ նաեւ հակված ենք մտածել, որ ավելի խիստ խափանման միջոցներ կկիրառվեն, որովհետեւ 30-ից ավելի դրվագներ էլ ենք ունենում, դեպքեր, երբ նույն անձը հայտաբերվում ու ձերբակալվում է, սակայն խափանման միջոցն ազատազրկման հետ կապ չի ունենում, եւ այդ անձը շարունակում է կատարել գողություն»,- ընդգծել է փոխնախարարը:

ՀՀ ԱԺ նախագահն անդրադարձել է նաեւ հանրության շրջանում տարածված այն վտանգավոր խոսույթին, թե հաճախակի նման հանցանքները կա՛մ ոստիկանության կողմից անտեսվում են, կա՛մ ինչ-որ մարդկանց կողմից հովանավորվում: Արմեն Մկրտչյանը նշել է, որ ոստիկանության ծառայության կազմակերպման մեթոդները եւ ձեւերը նպատակաուղղվում են այս հանցագործության դեմ պայքարին՝ հատկապես վերլուծելով ժամանակահատվածը եւ տեղանքները, որտեղ տեղի են ունենում այս գողությունները եւ մարտավարական տեսանկյունից եւս գործողություններ են ձեռնարկվում:

ԱԺ պետական-իրավական հարցերի մշտական հանձնաժողովի դրական եզրակացությունը ներկայացրել է Տրդատ Սարգսյանը:

Կարեւորելով նախաձեռնությունը՝ ՀՀ ԱԺ նախագահ Ալեն Սիմոնյանը ելույթում անդրադարձել է կալանքը՝ որպես խափանման միջոց, կիրառելու հարցին: ԱԺ նախագահի գնահատմամբ արատավոր պրակտիկա է, երբ մարդուն ազատազրկում են, փորձում տեղեկություն կորզել ու դրա հիման վրա կազմել քրեական գործ: Ալեն Սիմոնյանի համոզմամբ այդ պրակտիկան պետք է վերացվի: Նա կոչ է արել դատավորներին նման գործերով չբավարարել միջնորդությունները՝ անկախ այն հանգամանքից, թե ում է դա վերաբերվում: «Դիմում եմ բոլոր իրավապահ մարմիններին, հետեւելու եմ, բարձրաձայնելու եմ դրա մասին, խոսելու եմ, չանեք նման բան»,- եզրափակել է ելույթը խորհրդարանի ղեկավարը:

ԱԺ «Հայաստան» խմբակցության պատգամավոր Գառնիկ Դանիելյանը ողջունել է այդ արարքի համար նախատեսված խստացումը, խոսել թմրանյութերի շրջանառության կանխարգելման խնդրի վերաբերյալ: