Առնվազն 5 տոկոս տնտեսական աճը տարեկան 17-18 հազար մարդու աշխատանքի հնարավորություն կտա

Կառավարության ծրագիրը Հանրապետությունում աշխատատեղերի ավելացման ինչպիսի՞ հնարավորություններ է տալիս: Այս հարցին այսօր պատասխանեց Տնտեսական զարգացման և ներդրումների նախարար Տիգրան Խաչատրյանը՝ ներկայացնելով այսպիսի իրավիճակ.

«Զբաղվածները մասնավոր հատվածում մոտ 350 հազար են, և եթե մենք խոսում ենք այն մասին, որ առնվազն 5 տոկոս տնտեսական աճ է լինելու, դա նշանակում է, եթե արտադրողականությունը տնտեսության մեջ չավելանա, ապա տարեկան այսպիսի աճը թույլ կտա աշխատանք ունենալ 17-18 հազար մարդու: Կարող ենք ասել՝ քիչ է, կարող ենք ասել` դա է առկա հնարավորությունը, ձգտելու ենք անել ամեն ինչ, որ ավելի շատ ունենան»,-ասաց նախարարը:

Իսկ նախարարությունների և ենթակառուցվածքների օպտիմալացման արդյունքում բազմաթիվ մարդիկ մնալու են առանց աշխատանքի: Ի՞նչ ռիսկեր է տեսնում ու ի՞նչ հնարավորություններ սահմանում նրանց համար կառավարությունը:

«Այն մարդիկ, ովքեր օպտիմալացման արդյունքում կամ պետական կառույցների վերամիավորման արդյունքում կմնան առանց աշխատանքի, կարծում եմ, որ մասնավոր հատվածում իրենց կդրսևորեն: Եթե օպտիմիզացիա տեղի ունենա, ապա խնայված միջոցները, որպես աշխատավարձային բարձրացում, տրվելու են այն մարդկանց, ովքեր պահպանելու են աշխատատեղը, կառավարությունը կորոշի իր առաջիկա ծրագրերում, այն դեպքում, երբ միջոցներն օգտագործվեն պետության և հասարակության կարիքներով պահանջվող ծառայությունների գնման համար, ապա կգնա այն մասնավոր սուբյեկտներին և աշխատակիցներին, ովքեր էլ կունենան ավելացված եկամուտ: Տնտեսված միջոցները չեն մնում հաշիվների վրա, այլ ուղղվելու են ծախսմանը»,- նշեց Խաչատրյանը:

2019թ-ի բյուջեն նախատեսում է, որ տնտեսության մեջ ծախսերը նախորդ տարվա համեմատ ոչ թե կրճատվելու, այլ ավելանալու են:

«Այսօր մենք ունենք միջինը 5 տոկոս աճ, ինչը նշանակում է, որ 5 տարվա համագումարով 30 տոկոսով ավելի բարձր էր ՀՆԱ-ի ցուցանիշից, քան եղել է 2018-ին, և քանի որ ասում ենք, որ աճը լինելու է ներառական, ապա շարքային քաղաքացին 5 տարի հետ մոտ 30 տոկոսով ավելի բարձր եկամուտներ է ունենալու, քան այսօր»,- հավելեց նա:

Նախարարին հարց ուղղվեց նաև մասնագետների վերաորակավորման մասին, մասնավորապես` ինչպե՞ս է վերաբերում հանգամանքին, երբ ապահովագրական ընկերությունը պատրաստակամություն է հայտնում վերապատրաստելու ՊԵԿ մասնագետին:

«Եթե պետությունը որևէ մեկին վերաորակավորի, որ ապահովագրական ընկերությունում հետագայում ունենա աշխատանք, այդ որակավորումը չի կատարվի այնքան լավ, որքան կանի մասնավոր հատվածը: Մասնավոր հատվածում աշխատուժի ու աշխատանքի պայմանները թելադրում է մասնավոր հատվածը, և որակավորման պահանջներն է թելադրում, որովհետև տեխնոլոգիաները զարգանում են յուրահատուկ ձևով, ու կազմակերպությունն ինքն է որոշում, թե տեխնոլոգիական ինչ զինվածությամբ է գործելու եկող տարվա ընթացքում,- նշեց նախարարը:

Ըստ նրա՝ պետության գործառույթն էլ այս հարցում խրախուսելն է, որպեսզի մասնավոր կազմակերպությունները վերազինվեն, շարունակ հետևեն տեխնոլոգիական առաջընթացին, հրավիրեն աշխատանքի այն մարդկանց, ովքեր կարողանում են նոր տեխնոլոգիաներով աշխատել: